ގއ. ކޫއްޑޫގައި މަސް ރައްކާ ކުރުމަށް ބޭނުންކުރާ ކޯލްޑް ސްޓޯރޭޖްގެ ކެޕޭސިޓީ 4،000 ޓަނަށް އިތުރުކުރަން ކުންފުންޏަކާ މިއަދު ހަވާލުކޮށްފިއެވެ.

ފިޝަރީޒް މިނިސްޓްރީން އެ މަސައްކަތް ހަވާލުކުރީ ލަކީ ގްލޯބަލް ޕްރޮޖެކްޓްސް ނަމަކަށް ކިޔާ ކުންފުންޏަކާއެވެ. އެ މަޝްރޫއުގެ އެއްބަސްވުމުގައި ފިޝަރީޒް މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަހުމަދު ޝިޔާމެވެ. ލަކީ ގްލޯބަލް ޕްރޮޖެކްޓްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޝަރު އަޝިޝް އޮބްރޯއީއެވެ.

ކޫއްޑޫގައި މިވަގުތު ހުރީ 2،000 ޓަނުގެ ކޯލްޑް ސްޓޯރޭޖް ކެޕޭސިޓީއެވެ.

ސައުދީ ފަންޑް ފޯ ޑިވެލޮޕްމަންޓްގެ އެހީގައި 6.6 މިލިއަން ރުފިޔާ ހަރަދުކޮށްގެން ހިންގާ މަޝްރޫއު އެއް އަހަރުގެ ތެރޭގައި ނިންމަން ޖެހެއެވެ.

ރާއްޖޭގައި މި ވަގުތު ހުރީ ކޯލްޑް ސްޓޯރޭޖްގެ ކެޕޭސިޓީގެ ގޮތުގައި 8،500 ޓަނެވެ. ރައީސް ޑރ. މުހައްމަދު މުއިއްޒުގެ ވެރިކަމުގެ ފަސް އަހަރު ނިމުމުގެ ކުރިން ކޯލްޑް ސްޓޯރޭޖް ކެޕޭސިޓީ 25،000 ޓަނަށް އިތުރު ކުރުމަކީ އެމަނިކުފާނުގެ ރިޔާސީ ވައުދެކެވެ.

ކޯލްޑް ސްޓޯރޭޖް އިތުރުކުރުމަށް ދުނިޔޭގެ ބާޒާރުގައި ދިވެހިން ބާނާ މަހަށް އަގު ކަނޑައެޅުމުގެ ބާރު ދިވެހިންނަށް ލިބިގެންދާނެ އިރު، އާމްދަނީ ވެސް އިތުރުވާނެއެވެ.

ސަރުކާރުން ނިންމާފައި އޮތީ ކޫއްޑޫއަށް 4،000 ޓަނުގެ ކޯލްޑް ސްޓޯރޭޖެއްގެ އިތުރުން ގދ. ފިޔޯރީގައި 3،000 ޓަނު، ގދ. ތިނަދޫގައި 1،000 ޓަނު އަދި ސ. މީދޫގައި 500 ޓަނުގެ ސްޓޯރޭޖެއް ގާއިމު ކުރުމަށެވެ. އޭގެއިތުރުން ފ. ނިލަންދޫގައި 1،500 ޓަނުގެ ފެސިލިޓީއެއް އަދި މ. މުލަކުގައި 500 ޓަނުގެ ފެސިލިޓީއެއް ގާއިމުކުރަން ސަރުކާރުން ވަނީ ނިންމައިފައެވެ.