1988 ވަނަ އަހަރުގެ ނޮވެންބަރު 3 ވަނަ ދުވަހު ޤައުމަށްޓަކައި ފުރާނަ ޤުރުބާންކޮށްލެއްވި ޝަހީދު ޙުސައިން އާދަމް ދެއްކެވި ހިތްވަރަކީ ޤައުމު ދިފާޢުކުރުމުގައި މިއަދު ކޮންމެ ސިފައިންގެ މީހަކުވެސް ދައްކަން ބޭނުންވާ ހިތްވަރެއްގެ ގޮތުގައި އަޒުމް ކަނޑައަޅަންޖެހޭ ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ ވިދާޅުވެއްޖެއެވެ. ޖެނެރަލް އިބްރާހީމް ހިލްމީ މިހެން ވިދާޅުވީ ޖުމްހޫރީ މައިދާނުގައި ބޭއްވުނު ނަޞްރުގެ ދުވަހުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝަރަފުވެރިކޮށްދެއްވި މިރަސްމިއްޔާތުގައި ވާހަކަފުޅު ދައްކަވަމުން ހިލްމީ ވިދާޅުވީ، ދިވެހި އަސްކަރިއްޔާ އޮތީ ޤައުމުގެ ދިފާޢުގައި ސާބިތުވެ ކަމަށާއި، ދިވެހި ސިފައިން ތިބީ އެމީހުން ކޮށްފައިވާ ހުވަޔާ އެއްގޮތަށް ކަމުގެ ޔަޤީންކަން ދެއްވިއެވެ. އަދި ދިވެހިރާއްޖޭގެ މިނިވަންކަން ދިފާޢުކުރުމުގައި ދިވެހި ސިފައިން ތިބީ ފުރާނައިންވެސް ޤުރުބާންވުމަށް ތައްޔާރަށް ކަމުގެ ޔަޤީންކަން ދިވެހި ރައްޔިތުންނަށް ދޭން ބޭނުންވާ ކަމަށްވެސް ވިދާޅުވިއެވެ.
ހިލްމީ އިތުރަށް ވިދާޅުވީ މިއަދު އެންމެ އުފާވާ ކަމަކީ ސިފައިންގެ އެންމެ މަތީ ވެރިޔާއަކީ ޤައުމުދެކެ ލޯބިވެވަޑައިގަންނަވާ، ޤައުމުގެ މިނިވަންކަން ދިފާޢުކުރުމަށް އަސްކަރިއްޔާ އިތުރު ހަރުފަތަކަށް ގެންދަން ބޭނުންވެވަޑައިގަންނަވާ ބޭފުޅަކަށް ވުން ކަމަށެވެ. އަދި މިސަރުކާރުގެ ފުރަތަމަ އަހަރުގައިވެސް އަސްކަރިއްޔާ ތަރައްޤީކުރުމުގައި ނަތީޖާތަކެއް ހާޞިލްކޮށްދެއްވާފައިވާ ކަމަށް ފާހަގަކުރެއްވިއެވެ.
މީގެ ކުރިން ނަޞްރުގެ ދުވަސް ފާހަގަކުރަމުން އައީ ހަމައެކަނި ސިފައިންގެ ލެވެލްގައި ކަމަށްވުމުން، އެދުވަހަށް ދޭންޖެހޭ ސަމާލުކަން އެންމެ ރަނގަޅަށް އެންމެ އެދެވޭ ގޮތަށް ނުދެވިވާކަމަށާއި، އެހެންކަމުން މިސަރުކާރުން ނިންމާފައިވަނީ ނަޞްރުގެ ދުވަސް ވީހާވެސް ކުލަގަދަ ގޮތެއްގައި ފާހަގަކުރުމަށް ކަމަށްވެސް ހިލްމީ ވިދާޅުވިއެވެ.
