އިންޝުއަރެންސް ކުންފުނިތަކުން ކޭޝްލެސް ހިދުމަތް ހުއްޓާލި ނަމަވެސް، އަމިއްލަ ޖީބުން ފައިސާ ދައްކަންޖެހޭ ހާލަތްތަކުގައި ކުރިއެކޭ އެއްގޮތަށް އާސަންދަ ހިދުމަތް ލިބޭނެކަން އެންސްޕާއިން ކަށަވަރުކޮށްދީފިއެވެ.

އެންސްޕާއިން އާންމުކުރި ބަޔާނުގައި ބުނެފައިވަނީ މި ކަން މިހެން އިއުލާންކުރަން ޖެހުނީ މިދިޔަ ހުކުރު ދުވަހު އާސަންދައަށް ގެނައި ބަދަލާ ގުޅިގެން ކަމުގައެވެ. އެ ބަދަލުގެ ދަށުން، އައުޓް ޕޭޝަންޓްކޮށް ހިދުމަތް ހޯދާ ބަލިމީހުންނަށް ޕްރައިވެޓް އިންޝުއަރެންސް އޮތް ނަމަ، އެ އިންޝުއަރެންސްގެ ލިމިޓް ހަމަނުވާހާ ހިނދަކު ނުވަތަ އިންޝުއަރެންސްއިން ކަވަރުނުކުރާ ހިދުމަތްތަކަށް މެނުވީ އާސަންދަ ނުލިބޭގޮތަށް ހަމަޖެހުނެވެ. މި ބަދަލާ ގުޅިގެން ބައެއް އިންޝުއަރެންސް ކުންފުނިތަކުން ކޭޝްލެސް ހިދުމަތް މެދުކަނޑާލުމާއެކު، އިއްޔެއިން ފެށިގެން ހޮސްޕިޓަލްތަކުން އިންޝުއަރެންސް އޮންނަ ފަރާތްތަކުގެ އަތުން މުޅި ހިދުމަތުގެ އަގު ނަގަން ފަށާފައިވެއެވެ.

މި ކަމާ ގުޅިގެން ސަރުކާރަށް ފާޑުކިޔުންތައް އަމާޒުވަމުންދާތީ، އެންސްޕާއިން މިއަދު ނެރުނު ބަޔާނުގައި ވަނީ، އެއްވެސް ސަބަބަކާހުރެ ޕްރައިވެޓް އިންޝުއަރެންސް ނުލިބޭނަމަ، އާސަންދަ ސްކީމުން ހިދުމަތް ލިބެންޖެހޭނެކަމަށް ކުރިން ވެސް ބަޔާންކޮށްފައިވާކަން ފާހަގަކޮށްފައެވެ. އެގޮތުން، ކޭޝްލެސް ހިދުމަތް ހުއްޓާލުމުގެ ސަބަބުން އަމިއްލަ އިންޝުއަރެންސް ޕޮލިސީން ކަވަރޭޖު ނުލިބޭ ހާލަތުގައި، އަމިއްލަ ޖީބުން ފައިސާ ދައްކަންޖެހޭ ކޮންމެ ހާލަތެއްގައިވެސް، ކުރިއެކޭ އެއްގޮތަށް އާސަންދައިން ކަވަރޭޖު ލިބޭނެކަން އެ އިދާރާއިން ކަށަވަރުކޮށްދީފައިވެއެވެ.

އަދި މި މައްސަލައާ ގުޅޭގޮތުން ބައެއް ފަރާތްތަކުން ހަގީގަތް އޮޅޭގޮތަށް މައުލޫމާތު ފަތުރަމުންދާތީ، ސައްހަ މައުލޫމާތު ހޯދުމަށް އާސަންދަ ހޮޓްލައިން 1400 އަށް ގުޅުމަށް އެންސްޕާއިން އިލްތިމާސްކޮށްފައިވެއެވެ.