އައިލެންޑް އޭވިއޭޝަން ސާވިސް (އައިއޭއެސް) އިން މިދިޔަ އަހަރުގެ ޑިސެމްބަރު 28 ވަނަ ދުވަހު އާއިޝަތު ޖެނިފާ ޑެޕިއުޓީ މެނޭޖިން ޑިރެކްޓަރުގެ މަޤާމުން ވަކިކުރި ވަކިކުރުމަކީ ގާނޫނާ ޚިލާފު ވަކިކުރުމެއް ކަމަށް ވަޒީފާއާ ބެހޭ ޓްރައިބިއުނަލްއިން ކަނޑައަޅައިފިއެވެ. އަދި އޭނާއަށް އަލުން ވަޒީފާ ދިނުމަށް ވެސް އަމުރުކޮށްފައިވެއެވެ.
މި ހިނގާ އޮކްޓޯބަރު 13 ވަނަ ދުވަހު ޓްރައިބިއުނަލުން ނެރުނު ނިންމުމުގައި ބަޔާންކޮށްފައިވަނީ، މުވައްޒަފަކު ވަޒީފާއިން ވަކިކުރުމަށް ހުއްދަކުރާ ފަދަ ހާލަތެއް މެދުވެރިވެފައި ނުވާތީ، އޭނާ ވަޒީފާއިން ވަކިކޮށްފައިވަނީ ވަޒީފާއާ ބެހޭ ގާނޫނާ ޚިލާފަށް ކަމަށެވެ.
އައިލެންޑް އޭވިއޭޝަންގެ މައްޗަށް އަމުރުކޮށްފައިވަނީ އާއިޝަތު ޖެނިފާގެ ވަޒީފާ އަލުން އިއާދަކޮށް، އޭނާއަކީ ވަޒީފާއިން ވަކިވެފައިވާ މީހެއްގެ ގޮތުގައި ނުބެލުމަށެވެ. އަދި ވަޒީފާއިން ވަކިކުރި ދުވަހުން ފެށިގެން މައްސަލަ ނިމުނު ދުވަހާ ހަމައަށް ހިނގި މުއްދަތަށްވާ މުސާރައާއި އިނާޔަތްތައް ދިނުމަށް ވެސް އަންގާފައިވެއެވެ.
އާއިޝަތު ޖެނިފާގެ މަޤާމުގެ މުސާރައާއި އިނާޔަތްތަކުގެ ގޮތުގައި މަހަކު 56،171 ރުފިޔާ ލިބެމުންދިޔައެވެ. އެހެންކަމުން، އޭނާ ވަޒީފާއިން ވަކިކުރި ފަހުން ހިނގައިދިޔަ 10 މަސްދުވަހުގެ މުސާރައިގެ ގޮތުގައި 561،710 ރުފިޔާ އައިލެންޑް އޭވިއޭޝަނުން އޭނާއަށް ދޭންޖެހޭނެއެވެ.
މީގެ އިތުރުން، ވަޒީފާއިން ވަކިކުރުމުގެ ސަބަބުން ލިބުނު ގެއްލުމުގެ ބަދަލެއްގެ ގޮތުގައި އެއް މަހުގެ މުސާރައާއި އިނާޔަތްތައް ދިނުމަށް ވެސް އަންގާފައިވެއެވެ.
މި ފައިސާ ރަސްމީ ބަންދު ނޫން 30 ދުވަހުގެ ތެރޭގައި ދެއްކުމަށް ވެސް ހުކުމުގައި ބަޔާންކޮށްފައިވެއެވެ.
