ތެލަސީމިއާގެ ފަރުވާއަށް މިއަހަރު ބޯންމެރޯ ހެދުމަށް ރާއްޖެއިން ބޭރަށް ފޮނުވުނު ތިން ކުދިންގެ ފަރުވާ މިހާރު މުޅިން ފުރިހަމަވެފައިކަމަށް މޯލްޑިވިއަން ބްލަޑް ސަރވިސަސްއިން ހާމަކޮށްފިއެވެ.
މޯލްޑިވިއަން ބްލަޑް ސަރވިސަސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކް ޑރ. އަޙުމަދު ޢުމަރު ވިދާޅުވިގޮތުގައި ޒަކާތު ފަންޑުގެ އެހީގައި މިއަހަރު ޖުމްލަ 14 ކުދިން ވަނީ ބޯންމެރޯ ފަރުވާއަށް ފޮނުވިފައެވެ. މިގޮތުން ފަރުވާ މުޅިން ފުރިހަމަކޮށް ތެލަސީމިއާއިން ފަސޭހަވެފައިވާ ދެ ކުދިން މިހާރު ވަނީ ރާއްޖެ އައިސްފައެވެ. އަދި އިތުރު ކުއްޖަކުވެސް ކުރިއަށް އޮތް ދެ ހަފްތާގެ ތެރޭގައި ރާއްޖެ އަންނާނެކަމަށް އެމަނިކުފާނު ވިދާޅުވިއެވެ.
ހިތާމަޔާއެކު ފާހަގަކުރެވެނީ މިއަހަރު ބޯންމެރޯ ފަރުވާއަށް ފޮނުވުނު އެއް ކުއްޖަކު ނިޔާވެފައިވާކަމެވެ. އަދި ބާކީ 10 ކުދިން މިހާރު ތިބީ ބޯންމެރޯ އޮޕަރޭޝަނަށްފަހު އިތުރު ފަރުވާ ފުރިހަމަކުރަމުންނެވެ. އާންމުކޮށް ބޯންމެރޯ ފަރުވާއަށްފަހު ތިން މަހާއި ހަ މަހާ ދެމެދުގެ މުއްދަތެއް ކުދިން ހޭދަކުރަނީ ރާއްޖެއިން ބޭރުގައެވެ.
ކުރިއަށް އޮތް އަހަރަށް ބޯންމެރޯ ހެދުމަށް 10 ކުދިން ހޮވުމުގެ މަސައްކަތް މިހާރު ވަނީ ފެށިފައެވެ. މި މަސައްކަތުގައި ކުދިންގެ ލޭގެ ޓެސްޓުތަކާއި، ހިތާއި ލިވަރުގެ އެކި ޓެސްޓުތައް ހެދުމަށްފަހު، ބޯންމެރޯ ހަދާ ހޮސްޕިޓަލުގެ ޑޮކްޓަރުންގެ ޓީމެއް ރާއްޖެ އައިސް ކުދިން ބަލައި، އެ ކުދިންނަށް ބޯންމެރޯ ހެދިދާނެތޯ ބަލާ ނިންމާނެއެވެ.
ރާއްޖެއަކީ އާބާދީގެ ނިސްބަތުން ތެލަސީމިއާ އާބާދީ އެންމެ ބޮޑު އެއް ޤައުމެވެ. މިވަގުތު ރާއްޖޭގެ ތެލަސީމިއާ ދަފްތަރުގައި 959 މީހުން ރަޖިސްޓަރީ ކުރެވިފައިވާއިރު، 666 މީހުން ދުނިޔޭގައި ދިރިއުޅެމުންދެއެވެ.
އަދި މުޅި ރާއްޖޭގެ އާބާދީގެ 16.6 އިންސައްތައަކީ ތެލަސީމިއާ ވާރުތަކުރާ މީހުންނެވެ. މި ބަލިމީހުންގެ ދެބައިކުޅަ އެއްބައި އާބާދީ ދިރިއުޅެމުން ދަނީ މާލެ ސަރަޙައްދުގައެވެ.
