ސަރުކާރުން އައްޔަންކުރި ސިޔާސީ މުވައްޒަފުންގެ އަދަދާއި މަސްއޫލިއްޔަތުތައް ހާމަކުރުމަށް ގޮވާލައި ރައްޔިތުންގެ މަޖިލީހަށް މިއަދު މަޖިލީހަށް ކުއްލި މައްސަލައެއް ހުށަހަޅައިފިއެވެ.
ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި މި މައްސަލައިގައި، ސަރުކާރުން ދައުލަތުގެ ހަރަދުތައް ކުޑަކުރުމުގެ ގޮތުން ދައުލަތުގެ އެކި މުއައްސަސާތަކާއި، އިދާރާތަކާއި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރަ ކުޑަކުރުމަށް ނިންމާފައިވާއިރު، މިހާތަނަށް ސަރުކާރުން އައްޔަންކޮށްފައިވާ ސިޔާސީ މުވައްޒަފުންގެ އަދަދާއި އެ މަގާމުތަކުގެ މަސްއޫލިއްޔަތުތައް ހާމަކުރުމަށް ވަނީ ގޮވާލައްވާފައެވެ.
ނަމަވެސް މި މައްސަލައަށް ބަހުސްކުރުމާމެދު ގޮތެއް ނިންމުމަށް ރިޔާސަތުން ވޯޓަށް އެއްސެވުމުން، ވޯޓުގައި ބައިވެރިވި 67 މެންބަރުންގެ ތެރެއިން 59 މެންބަރުން ވޯޓުދެއްވީ މައްސަލައަށް ބަހުސްކުރުމަށް ނުފެންނަ ކަމަށެވެ. އަދި އެންމެ 8 މެންބަރުން ވޯޓުދެއްވީ ބަހުސްކުރަން ފެންނަ ކަމަށެވެ. މިގޮތަށް ވޯޓު ލިބުމާއެކު މި ކުއްލި މައްސަލަ ވަނީ ބަލައިނުގަނެ ބޭރުކޮށްލާފައެވެ.
މީގެ ކުރިން މިދިޔަ ޖުލައި މަހުވެސް އެމްޑީޕީގެ މެންބަރުން ވަނީ ސިޔާސީ މަގާމުތަކުގެ އަދަދު ހާމަކުރުމަށް ގޮވާލައި ކުއްލި މައްސަލައެއް ހުށަހަޅުއްވާފައެވެ. އޭރު އެމްޑީޕީން ގޮވާލެއްވީ ސިޔާސީ މަގާމުތަކުގެ އަދަދުގެ އިތުރުން އެ މުވައްޒަފުންނަށް މުސާރައިގެ ގޮތުގައި ހޭދަކުރާ އަދަދުވެސް ހާމަކުރުމަށެވެ. އެހެންނަމަވެސް އެ މައްސަލަވެސް ވަނީ ބޭރުކޮށްލާފައެވެ.
