ޝިއާއު މުހައްމަދު ސައީދުގެ މަރުގެ މައްސަލައިގައި ތުހުމަތުކުރެވޭ އަލީ ޝާހިލްގެ މައްޗަށް ދައުލަތުން އުފުލާފައިވާ ދައުވާގެ ޝަރީއަތެއް ހޯމަ ދުވަހު ހެނދުނު ކްރިމިނަލް ކޯޓުގައި ބާއްވާގޮތަށް ތާވަލުކޮށްފައިވެއެވެ.
ނަމަވެސް މި އަޑުއެހުން ބާއްވަނީ ސިއްރު އަޑުއެހުމެއްގެ ގޮތުގައެވެ. ޝާހިލްގެ މައްޗަށް ކުރެވޭ ދައުވާތައް ސިއްރުން ކުރިއަށްދާއިރު، ބައެއް މައްސަލަތަކުގެ ބާވަތްވެސް ވަނީ ސިއްރުކޮށްފައެވެ.
މީގެ ކުރިން ޝާހިލް ތަޙްޤީޤުގައާއި ޝަރީޢަތުގައި އެއްވެސް ވާހަކައެއް ނުދައްކައި ހުރުމަށްފަހު، އެންމެ ފަހުން ވާހަކަދައްކަން ފަށައި، މައްސަލަ ކުރިއަށް ގެންދަން ބޭނުންވަނީ ވަކީލަކާ ނުލައި ކަމަށް ބުނެފައިވެއެވެ. ޝާހިލްއަށް ތިން ފަހަރެއްގެ މަތިން ދިފާއީ ވަކީލުން ޢައްޔަންކޮށްފައިވީ ނަމަވެސް، އޭނާ އެއްވެސް ވަރަކަށް އެއްބާރުލުން ނުދިނުމުގެ ސަބަބުން މައްސަލަ ކުރިއަށް ނުގޮސް އޮތްއިރު، މިހާތަނަށް ޝާހިލް ހުރީ ބަންދުގައެވެ.
ޝާހިލްގެ މައްޗަށް ކުރެވިފައިވާ ދަޢުވާތަކުގެ ތެރޭގައި ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމާއި، އޮރިޔާން ކާޑު ގެންގުޅުމާއި، ކެނެބިސް ބޭނުންކުރުމުގެ އިތުރުން ސިއްރުކޮށްފައިވާ ދެ ދަޢުވާ ހިމެނެއެވެ. ޝިއާއު މަރާލުމަށްފަހު އޭނާގެ ބޮލާއި ހަތަރެސްފައި ބުރިކޮށްލާފައިވާކަމަށް ބެލެވެއެވެ.
ޝާހިލްގެ ބައްޕަ ވަނީ ކުރިން ދިން އިންޓަވިއުއެއްގައި، ޝާހިލްއަކީ އޭނާ އެންމެ ލޯބިވާ އެއް ދަރިފުޅު ނަމަވެސް، ގަސްދުގައި މީހަކު މަރައިފިނަމަ އިސްލާމީ ޝަރީޢަތާ އެއްގޮތަށް ޙައްޤު އަދަބު ދިނުމަށް އެދޭކަމަށް ބުނެފައެވެ.
އަދި ޝިއާއުގެ ޢާއިލާއިން ބޭނުންވަނީ މަރަށް މަރު ކަމަށްވެސް ފާހަގަކުރެވެއެވެ.
