ގދ. ނަޑެއްލާގައި ހިނގި އެކްސިޑެންޓެއްގައި އަނިޔާވި ދެ މީހަކަށް ފަރުވާ ދިނުމަށް މާލެ ގެނެސްފިއެވެ.
ފުލުހުން ބުނީ ނަޑެއްލާ ޖެޓީ މަގުން ބާރު ސްޕީޑުގައި ދުއްވި ސައިކަލެއް ކޮންޓްރޯލްނުވެގެން، އެ ސަރަހައްދުގައި މަޑުކޮށްފައި އޮތް ރަށު ޕިކަޕެއް ކައިރީގައި ހުރި މީހެއް ގައިގައި ޖެހިފައިވާ ކަމަށެވެ. މި އެކްސިޑެންޓުގެ ރިޕޯޓު ފުލުހުންނަށް ލިބުނީ ރޭ 12 ޖަހާކަންހާއިރެވެ.
އެ ސައިކަލުގައި އުމުރުން 18 އަހަރުގެ ދެ މީހުން ތިބި އިރު، ސައިކަލް ދުއްވަން އިން މީހާގެ ލައިސަންސް ނެތް ކަމަށް ފުލުހުން ބުންޏެވެ.
ޕިކަޕު ކައިރީ މަޑުކޮށްލައިގެން ހުރީ 47 އަހަރުގެ މީހެކެވެ.
ތިން މީހުން ވެސް އެކްސިޑެންޓުވުމުން ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލަށް ގެންގޮސް ވަނީ ފަރުވާދީފައެވެ.
އޭގެ ތެރެއިން ސައިކަލު ދުއްވި މީހާއާއި ޕިކަޕު ކައިރީގައި ހުރި މީހާ މިއަދު ވަނީ އިތުރު ފަރުވާއަށް މާލެ ގެނެސްފައެވެ. ދެ މީހުންނަށް ވެސް ފަރުވާދެމުން އަންނަނީ އޭޑީކޭ ހޮސްޕިޓަލުގައެވެ.
ފުލުހުން އަންނަނީ މި މައްސަލަ ތަހުގީގުކުރަމުންނެވެ.
