މި އަހަރުގެ ޖަނަވަރީން ސެޕްޓެންބަރުގެ ނިޔަލަށް ދައުލަތަށް ޑޮލަރުން ލިބުނު އާމްދަނީ ވަނީ ނިމުނު އަހަރަށްވުރެ 13.6 އިންސައްތަ އިތުރުވެފައިވާކަމަށް މީރާގެ ހިސާބުތަކުން ދައްކާއިިފިއެވެ.
މިގޮތުން މިއަހަރު 801.2 މިލިއަން ޑޮލަރު ލިބިފައިވާއިރު، ނިމުނު އަހަރު ލިބުނީ 705.1 މިލިއަން ޑޮލަރެވެ. މިއީ 96 މިލިއަން ޑޮލަރުގެ އިތުރުވުމެކެވެ.
ޑޮލަރުން އެންމެ ބޮޑު އާމްދަނީއެއް ލިބިފައިވަނީ ޓެކުހުގެ ގޮތުގައެވެ. މި އަހަރު ޓެކުހުގެ ގޮތުގައި 175.5 މިލިއަން ޑޮލަރު ލިބިފައިވާއިރު، މިއީ 2023 ގައި ލިބުނު އަދަދަށްވުރެ 42 މިލިއަން ޑޮލަރު އިތުރު އަދަދެކެވެ. ޑިޕާޗާ ޓެކުހާއި ގްރީން ޓެކްސްގެ ގޮތުގައި ލިބުނު އަދަދުވެސް ވަނީ އިތުރުވެފައެވެ. އެންމެ ބޮޑަށް އިތުރުވެފައިވަނީ ޓީޖީއެސްޓީ އެވެ. ޓީޖީއެސްޓީ ނަގާ ރޭޓު ބަދަލުކުރުމާ ގުޅިގެން މިއަހަރު 469 މިލިއަން ޑޮލަރު ލިބިފައިވެއެވެ.
އެހެންނަމަވެސް، އާމްދަނީން ނަގާ ޓެކުހުގެ ގޮތުގައި ޑޮލަރު ލިބުނު މިންވަރު ނިމުނު އަހަރަށްވުރެ މަދުވެފައިވެއެވެ. ޓެކުސް ނޫން ގޮތްގޮތުން ލިބުނު އާމްދަނީއަށް ބަލާއިރު، އެކުއިޒިޝަންގެ ގޮތުގައި ލިބުނު އަދަދު ދެގުނަ އިތުރުވެ، 6.3 މިލިއަން ޑޮލަރަށް އަރާފައިވެއެވެ. ފަތުރުވެރިކަމަށް ދޫކޮށްފައިވާ ބިންތަކުގެ ލީސް މުއްދަތު އިތުރުކުރުމުގެ ފީގެ ގޮތުގައި 15 މިލިއަން ޑޮލަރު ލިބިފައިވާއިރު، ބިމު ކުލީގެ ގޮތުގައި 92.3 މިލިއަން ޑޮލަރު ލިބިފައިވެއެވެ.
ޖުމްލަ ގޮތެއްގައި، ދިވެހި ރުފިޔާއިން ލިބުނު 9.6 ބިލިއަން ރުފިޔާއާއި ޑޮލަރުން ލިބުނު 12.3 ބިލިއަން ރުފިޔާއާއެކު، ގާތްގަނޑަކަށް 22 ބިލިއަން ރުފިޔާ ދައުލަތަށް ލިބިފައިވެއެވެ. މިއީ ނިމުނު އަހަރަށްވުރެ ތިން ބިލިއަނެއްހައި ޑޮލަރު އިތުރު މިންވަރެކެވެ.
