ދައުލަތުގެ ބަޖެޓުން ހުރިހާ ސިޔާސީ ޕާޓީތަކަށް ފައިސާ ދޭ ގޮތަށް ސިޔާސީ ޕާޓީގެ ޤާނޫނަށް އިޞްލާޙު ގެނައުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ. މިހާރު ޤާނޫނުގައި އޮންނަ ގޮތުން ބަޖެޓުން ފައިސާ ލިބެނީ 10,000 މެންބަރުން ހަމަވާ ޕާޓީތަކަށް އެކަނިއެވެ.
އީސީގެ މެންބަރު އަދި ތަރުޖަމާނު ހަސަން ޒަކަރިއްޔާ ވިދާޅުވި ގޮތުގައި، މި ބަދަލުތައް ހިމެނޭ ޑްރާފްޓް ބިލެއް ތައްޔާރުކޮށްފައިވަނީ މީގެ ދެ އަހަރު ކުރިން، ޕާޓީތަކުގެ އެއްބަސްވުމާ އެކުގައެވެ. މިއަދު އަލުން ސިޔާސީ ޕާޓީތަކާ ބައްދަލުކޮށް، މި ޑްރާފްޓާ ގުޅޭ ގޮތުން މަޝްވަރާކުރެވުނެވެ.
ޒަކަރިއްޔާ އިތުރަށް ވިދާޅުވި ގޮތުގައި، ޑްރާފްޓް ބިލުގައި ހިމަނާފައިވަނީ 3,000 މެންބަރުން ހަމަވާ ކޮންމެ ޕާޓީއަކަށް، ޕާޓީތަކަށް ދޫކުރާ ފައިސާގެ 25 ޕަސެންޓް ދިނުމަށެވެ. މިއީ ކުދި ޕާޓީތައް ހިންގުމަށް އެހީތެރިވުމުގެ ގޮތުންނެވެ. އަދި އަނެއް 25 ޕަސެންޓް 10,000 މެންބަރުން ހަމަވާ ޕާޓީތަކަށް ދިނުމަށް ހިމަނާފައިވެއެވެ.
މީގެ އިތުރުން، ދައުލަތުގެ ބަޖެޓުން ޕާޓީތަކަށް ދޫކުރާ ފައިސާގެ 50 ޕަސެންޓް، އެ ޕާޓީއަކަށް ވޯޓު ލިބޭ އަދަދަށް ބަލައިގެން ދޫކުރާ ގޮތަށް ނިންމާފައިވެއެވެ. މިގޮތަށް ނިންމީ ކުދި ޕާޓީތަކުގެ މެދުގައި އިންތިޚާބުތަކުގައި ވާދަކުރުމުގެ ޝައުޤުވެރިކަން އިތުރުކުރުމުގެ ބޭނުމުގައެވެ. ޒަކަރިއްޔާ ވިދާޅުވި ގޮތުގައި މި ޑްރާފްޓް ބިލު މި ހަފުތާ ތެރޭގައި އެޓަރނީ ޖެނެރަލްގެ އޮފީހަށް ފޮނުވާނެއެވެ.
