ސިޔާސީ ޕާޓީއަކުން ވަކިވާން ބޭނުން ނަމަ، އޮންލައިންކޮށް ހުށަހަޅަން ޖެހޭ ގޮތަށް ބަދަލުކޮށްފިއެވެ.
އިލެކްޝަންސް ކޮމިޝަން (އީސީ) އިން މިއަދު ބުނީ ސިޔާސީ ޕާޓީތަކުގެ މެމްބަރުންގެ ދަފްތަރުން ވަކިވާން މާދަމާ އިން ފެށިގެން ހުށަހަޅަން ޖެހޭނީ އެ ކޮމިޝަންގެ ޕޯޓަލް (my.elections.gov.mv) އަށް ކަމަށެވެ.
ސިޔާސީ ޕާޓީތަކުން ވަކިވާން ބޭނުންވާ މީހުންނަށް ފަސޭހައިން އެކަން ކުރެވޭނެ ގޮތަށް ސިޔާސީ ޕާޓީގެ ގަވާއިދަށް އިލެކްޝަންސް ކޮމިޝަނުން އިސްލާހް ގެނެއީ ސެޕްޓެމްބަރު މަހުގެ 23 ވަނަ ދުވަހެވެ.
ސިޔާސީ ޕާޓީތަކުގެ ގަވައިދަށް މި ފަހުން ގެނައި ނުވަ ވަނަ އިސްލާހުގައި ބުނީ ޕާޓީން މެމްބަރަކު ވަކިވުމަށް އެދޭތާ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެ ކަމަށެވެ. އެ މުއްދަތުގެ ތެރޭގައި އެކަން ނުކޮށްދީފި ނަމަ އީސީން ކަނޑައަޅާ ނިޒާމުގެ ތެރެއިން ޝަކުވާ ހުށަހެޅުމުން އޭނާގެ ނަން، ޕާޓީގެ ދަފްތަރުން އުނިކޮށްދޭން ޖެހޭނެއެވެ.
އަދި ސިޔާސީ ޕާޓީއެއްގެ މެންބަރަކު އުޅުން މަނާ މަގާމަކަށް ކުރިމަތިލުމަށް ނުވަތަ އެ މީހަކަށް ނޭނގި ޕާޓީއެއްގައި ރަޖިސްޓަރީކޮށްގެން، ޕާޓީން ވަގުތުން ވަކިވާން އެދި އީސީން ކަނޑައަޅާ ނިޒާމުގެ ތެރެއިން ހުށަހެޅުމުން އުނިކޮށްދޭން ވެސް ވާނެ ކަމަށް ބުނެފައިވެއެވެ.
