ސަރުކާރު ހިންގާ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް މެންބަރުން އިތުރުކުރުމަށްޓަކައި ކޮރަޕްޝަން ހިންގައި، މުވައްޒަފުންނަށް ބިރުދައްކަމުންދާ ކަމަށް ތުހުމަތު، ސަރުކާރު ކޯލިޝަންގައި ހިމެނޭ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ނައިބު ލީޑަރު މުޙައްމަދު އައްބާސް ކޮށްފިއެވެ.
އެކްސް އަދި ފޭސްބުކްގައި ކުރި ޕޯސްޓުތަކެއްގައި އައްބާސް ވިދާޅުވެފައިވަނީ، ސަރުކާރުގެ ކުންފުނިތަކުގެ ވެރިން ކުންފުނިތަކުގެ ބޭނުން ނަހަމަ ގޮތުގައި ހިފަމުންދާ ކަމަށާއި، މެންބަރުން އިތުރުކުރުމަށް ކުންފުނިތަކަށް ބިލްކުރާ ގޮތަށް ދަތުރުކުރަމުންދާ ކަމަށެވެ. އަދި މިއީ ރައްޔިތުންގެ ފައިސާއަށް ޚިޔާނާތްތެރިވުން ކަމަށްވެސް އޭނާ ވިދާޅުވެފައިވެއެވެ.
އައްބާސް އިތުރަށް ވިދާޅުވެފައިވަނީ، ސަރުކާރުގެ ވަޒީރުން އެމްޑީއޭގެ މަދު ސިޔާސީ މަޤާމުތަކުގައި ތިބި ފަރާތްތަކަށް ވަޒީފާގެ ބިރުދައްކައި، ޕީޕީއެމްއަށް 10 ފޯމު ނުގެނެސްފިނަމަ ވަޒީފާއިން ވަކިކުރާނެ ކަމަށް ބުނަމުންދާ ކަމަށެވެ.
އެމްޑީއޭއަށް ދީފައިވާ މަދު ސިޔާސީ މަގާމުތަކުގައި ތިއްބެވި ބޭފުޅުންނަށް ވަޒީރުން ވަޒީފާގެ ބިރު ދައްކާ ޕީއެންސީއަށް 10 ފޯމް ނުގެނެސްފިނަމަ ވަޒީފާއިން ވަކިކުރާނެކަމަށް ބުނުމަކީ ލަދުވެތިކަމެއް.
އަދި އެމްޑީއޭއަށް ހައްޤުވާ ހިއްސާ ނުދީ، ކޯލިޝަން އެގްރީމެންޓުގައިވާ ވަޒީފާތައް ނުދީ، އެމްޑީއޭ ކުރިއަރައި ރައްޔިތުންގެ ތާއީދު އެ ޕާޓީއަށް އިތުރުވަމުންދާތީ އެކަން ހަޖަމުނުވެގެން އުޅޭ ކަމަށްވެސް އޭނާ ވިދާޅުވެފައިވެއެވެ.
އައްބާސް އިތުރަށް ފާހަގަކުރައްވާފައިވަނީ، ކޯލިޝަން އެގްރީމެންޓު ހެދި އިރު ދެކެވުނު ވާހަކަތައް ހަނދާން ނެތުމަކީ އިޚްލާޞްތެރިކަމާމެދު ސުވާލު އުފެދޭ ކަމެއް ކަމަށެވެ.
އެދުވަހު ކޯލިޝަން އެގްރިމެންޓް ހަދާ ސޮއިކުރުމުގެ ކުރިން މާތް ﷲ ގަންދީ ހުވާކޮށްފައި ވިދާޅުވި ބަސްފުޅުތައް މަތިން ހަދާން ނެތިމަކީ އިހްލާސްތެރިކަމާއި މެދު ސުވާލު އުފެދޭކަމެއް.
ރައީސް ޑރ. މުޢިއްޒުގެ އެދިވަޑައިގަތުމަށް ނޮވެންބަރު މަހުގެ ކުރިން ޕީޕީއެމްއަށް 75,000 މެންބަރުން ހަމަކުރުމަށް މަސައްކަތްކުރަމުންދާ ކަމަށާއި، އެކަމަށްޓަކައި އަތޮޅުތަކަށް ދަތުރުކުރަމުންދާ ކަމަށް ޕީޕީއެމްއިން ބުނެފައިވާކަން ފާހަގަކުރެވެއެވެ.
