މާލޭގައި ކާރަކާއި ސައިކަލެއް ޖެހިގެން ހިނގި ނުރައްކާތެރި އެކްސިޑެންޓެއްގައި އަނިޔާވި ޒުވާނާ ނިޔާވެއްޖެއެވެ.
މިދިޔަ ބުދަ ދުވަހުގެ ރޭ 12:53 ހާއިރު ހިނގި މި އެކްސިޑެންޓުގައި ސީރިއަސް އަނިޔާތަކެއް ލިބުމާ ގުޅިގެން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާ ދެމުންދަނިކޮށް ނިޔާވީ ގދ. ގައްދޫ، އުމުރުން 21 އަހަރުގެ މުޙައްމަދު ލީވާން ޢަބްދުލް ލަތީފެވެ.
މަޢުލޫމާތު ލިބިފައިވާ ގޮތުގައި އޭނާ ނިޔާވީ އައިޖީއެމްއެޗްގެ އައިސީޔޫގައި ވެންޓިލޭޓަރުގައި ފަރުވާދެމުންދަނިކޮށް ރޭގެ ވަގުތެއްގައެވެ. މި އެކްސިޑެންޓް ހިނގީ މާލޭގެ ބޮޑުތަކުރުފާނުމަގާއި ކޮއިމަލާ ހިނގުން ގުޅޭ ކަންމަތީގައި ކާރަކާއި ސައިކަލެއް ޖެހިގެންނެވެ. އެކްސިޑެންޓާ ގުޅިގެން ފަރުވާ ދެމުންދަނިކޮށް ނިޔާވި ލީވާންއަކީ ސައިކަލް ދުއްވަން އިން މީހާކަމަށް ފުލުހުން ވިދާޅުވެއެވެ.
މި ޙާދިސާއާ ގުޅިގެން ސައިކަލާއި ކާރަށްވެސް އެކިވަރުގެ ގެއްލުންތައް ލިބިފައިވެއެވެ. މި މައްސަލަ ފުލުހުން ދަނީ އިތުރަށް ތަހުޤީޤުކުރަމުންނެވެ.
މާލޭގައި ހިނގި މި އެކްސިޑެންޓުގައި އަނިޔާވި ޒުވާނާ ނިޔާވިއިރު، މިދިޔަ ހުކުރު ދުވަހުގެ ރޭ ހުޅުމާލޭގައިވެސް ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓެއްގައި 23 އަހަރުގެ ޒުވާނަކު ވަނީ ނިޔާވެފައެވެ.
