ރާއްޖޭގައި ފުޅާ ދާއިރާއެއްގައި ޑަކްޓަރީ ބޭސް އިމްޕޯޓުކޮށް ވިއްކާ ފަރާތެއް ކަމުގައިވާ ޙުސައިން ޢިރުފާނުގެ މައްޗަށް ޖިނާއީ ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހުށަހަޅާފިއެވެ. މި މައްސަލައިގައި ތުހުމަތު ކުރެވެނީ ޢިރުފާން ގަސްދުގައި ޓެކުހަށް މަކަރުހެދި ކަމަށެވެ.
މީރާގެ ތަޙުޤީޤުން ދައްކާގޮތުގައި، ޢިރުފާނުގެ ހޯލްސޭލް ވިޔަފާރިކަމުގައިވާ "މައި ކެމިސްޓް ގޯޑައުން" އާ ގުޅޭ އާމްދަނީ 2018، 2019 އަދި 2020 ވަނަ އަހަރުގެ ޓެކްސް ބަޔާންތަކުގައި ހިމަނާފައި ނުވެއެވެ. އެވަރެޖްކޮށް އަހަރަކު 53 މިލިއަން ރުފިޔާގެ އާމްދަނީ ރިޕޯޓުކޮށްފައި ނުވާކަން ފާހަގަކުރެވިފައިވެއެވެ. މީގެ ސަބަބުން، މީރާއިން ކުރިއަށް ގެންދިޔަ އޮޑިޓުތަކުގައި ޖުމުލަ 12 މިލިއަނަށްވުރެ ގިނަ ރުފިޔާ އިތުރަށް ދައްކަންޖެހޭ ޓެކުހުގެ ގޮތުގައި ކަނޑައަޅައިފައިވެއެވެ.
ޓެކްސް ނެގުމާބެހޭ އިދާރީ ޤާނޫނުގެ ދަށުން، ދައްކަންޖެހޭ ޓެކްސް ދެއްކުމަށް ގަސްދުގައި އެއްކިބާވުމަކީ ކުށެކެވެ. މީރާއިން ޓެކުހާ ގުޅުންހުރި ކުށްތައް ބަލައި، ތަޙުޤީޤުކުރުމުގެ ބާރު ލިބިގެންވެއެވެ. މިގޮތުން، ވިޔަފާރި ހަރަކާތްތަކާއި ލިޔެކިޔުންތައް ބަލައި ފާސްކުރުމާއި، މަޢުލޫމާތު ހޯދުމަށް މީހުން ހާޒިރުކޮށް ބަޔާން ނެގުމުގެ އިޚްތިޔާރު މީރާއަށް ލިބިދީފައިވެއެވެ.
މީރާއިން އާންމުންނަށް އިލްތިމާސްކޮށްފައިވަނީ، ޓެކުހާ ގުޅޭ އެއްވެސް ކުށެއް، އޮޅުވާލުމެއް ނުވަތަ މަކަރެއް ހަދަމުންދާކަމަށް ޝައްކުކުރެވޭނަމަ، އެ މަޢުލޫމާތު "މީރާ 918 – މައްސަލަ ހުށަހަޅާ ފޯމު" މެދުވެރިކޮށް ހުށަހެޅުމަށެވެ. މި ފޯމު މީރާގެ ވެބްސައިޓްގައިވާ "ވިސްލް ބްލޯވިންގ" ފަންކްޝަން މެދުވެރިކޮށް ހުށަހެޅިދާނެއެވެ.
