މާލޭ މަގުތަކުގެ ކަންކަންމަތީގައި ޕާކްކުރުން ހުއްޓުވުމަށް ރަތް ރޮނގު ދަމައި، ގަވާއިދާ ހިލާފްވާ ވެހިކަލްތައް ޓޯކުރަން ނިންމައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ މާލޭ ސިޓީގެ ކަންކަންމަތީގައި ވެހިކަލްތައް ޕާކްކުރުން ހުއްޓުވުމަށް ކުރެވިދާނެ ބައެއް ކަންތައްތަކާ ބެހޭ ގޮތުން މާލޭ ސިޓީގެ މޭޔަރާއި ޕޮލިސް ކޮމިޝަނަރާ އެކު މިއަދު މަޝްވަރާތައް ކުރައްވާފައިވާ ކަމަށާއި އަދި އެ ކަންތައްތައް ވަކި ގޮތަކަށް ނިމިފައިނުވާ ކަމަށެވެ. ނަމަވެސް ކުރިއަށް އޮތް ހަފްތާގެ ތެރޭގައި އެ ކަންކަން ކުރިއަށް ގެންދާނެ ގޮތްތަކެއް ކަނޑައަޅައި، އިއުލާން ކުރައްވާނެ ކަމަށް މިނިސްޓަރ ވިދާޅުވި އެވެ.
"މާލޭ ސިޓީ ކައުންސިލުން ރެޑް ލައިނެއް ވަކި ރޭޑިއަސްއެއްގައި ކަނޑައަޅާނެ ކަަަމަށް މިބަލަނީ. ކަނޑައަޅައިފައި އެ ތަންތާނގައި ޕާކްކުރުން މަނާކުރުން އިއުލާންކުރުން. އެއީ ވަކި ސަރަހައްދެއް، ކޮންމެ ކަންކަންމަތީގެ ސަރަހައްދު ކަނޑައަޅާފައި ރެޑްޓޭޕް ބިންމަތީގައި ކުރަހާފަ ޕާކްކުރުރުން މަނާކުރުން. އެއީ މާލޭ ސިޓީން ކުރައްވާނެ ކަމެއް،" އަމީން ވިދާޅުވި އެވެ.
މިނިސްޓަރު ވިދާޅުވީ މިގޮތަށް ކަންމަތީގައި ޕާކްކުރުން ހުއްޓުވުމަށް ރެޑްޓޭޕް ދެމުމުން ވެސް ވެހިކަލް ޕާކްކުރާނަމަ އެ ވެހިކަލެއް ލޮކްކޮށް އަދި ޓޯވެސް ކުރެވިދާނެ ކަމަށެވެ.
މާލޭގައި އޮތް ޓްރެފިކްގެ މައްސަލަ ކުރިއަށް އޮތް ތަނުގައި އިތުރަށް ގޯސްވިޔަނުދީ ރަނގަޅުވަމުންދާނެ ކަމަށް މިނިސްޓަރު ވިދާޅުވި އެވެ.
މިދިޔަ އަހަރުގެ ހިސާބުތަކަށް ބަލާއިރު މާލޭގެ މަގުމައްޗަށް މަހެއްގެ މައްޗަށް 130 އެއްހާ ވެހިކަލް އުފަންވެ، ރަޖިސްޓްރީވަމުން ދިޔަ ކަަމަށާއި ނަަމަވެސް މިހާރު ހަ ވެހިކަލް ވެސް ރަޖިސްޓްރީވަމުން ނުދާކަން މިނިސްޓަރ ފާހަގަކުރެއްވި އެވެ.
