އިންޑިއާގެ ޚަރިޖީ ވަޒީރު ޑރ. ސުބްރަމާނިޔަމް ޖައިޝަންކަރު ރާއްޖޭގައި ހޭދަކުރެއްވި ތިން ދުވަހުގެ ރަސްމީ ދަތުރުފުޅު މިއަދު ނިންމަވާލައްވައި އައްޑޫ އިން ފުރާވަޑައިގެންފިއެވެ.
މި ދަތުރުފުޅުގައި ޖައިޝަންކަރު ވަނީ ރައީސުލްޖުމްހޫރިއްޔާ މުޙައްމަދު މުއިއްޒުއާ ބައްދަލުކުރައްވައި، ދެ ޤައުމުގެ ގުޅުން ބަދަހިކުރުމާ ގުޅޭގޮތުން މަޝްވަރާކުރައްވާފައެވެ. އަދި ފޮރިން މިނިސްޓަރު މޫސާ ޒަމީރާއި އިޤްތިޞާދީ ވަޒީރު މުޙައްމަދު ސައީދާ ވަކިވަކިން ބައްދަލުކުރައްވައި، ސަރުކާރުގެ 5 މިލިއަން ގަސް ޕްރޮގްރާމަށް އެއްބާރުލުން ދެއްވުމުގެ ގޮތުން މާލޭ ލޮނުޒިޔާރަތްކޮޅުގައި ގަހެއް އިންދަވާފައިވެއެވެ.
މީގެއިތުރުން، އިންޑިއާގެ އެހީގައި ކުރިއަށްދާ ތިލަފުށި ބްރިޖު މަޝްރޫޢުގެ މަސައްކަތް ބައްލަވާލައްވައި، ރަށްރަށުގައި އިންޑިއާގެ އެހީގައި ނިންމާފައިވާ މަޝްރޫޢުތަކެއް އިފްތިތާޙުކުރައްވާފައިވެއެވެ.
ޖައިޝަންކަރުގެ ދަތުރުފުޅުގައި އިދިކޮޅު އެމްޑީޕީގެ އިސް ބޭފުޅުންނާވެސް ބައްދަލުކުރައްވާފައިވެއެވެ. މި ދަތުރުފުޅު ނިންމަވާލެއްވީ އިންޑިއާގެ އެހީގައި އައްޑޫގައި ނިންމާފައިވާ ދެ މަޝްރޫޢެއް ސަރުކާރާ ޙަވާލުކުރުމުގެ ރަސްމިއްޔާތުގައި ބައިވެރިވެވަޑައިގަތުމަށްފަހުއެވެ.
މިއީ ރައީސް މުއިއްޒުގެ ވެރިކަމުގައި އިންޑިއާގެ ވަޒީރަކު ރާއްޖެއަށް ކުރެއްވި ފުރަތަމަ ރަސްމީ ދަތުރުފުޅެވެ.
