އިންޑިއާގެ ޚާރިޖީ ވަޒީރު ޑރ. އެސް. ޖައިޝަންކަރު އައްޑޫ ސިޓީއަށް ވަޑައިގެންފިއެވެ.
ޑރ. ޖައިޝަންކަރު އައްޑޫއަށް މިއަދު ހެނދުނު 10:30 ހާއިރު ވަޑައިގެންނެވުމުން އައްޑޫ އިންޓަނޭޝަނަލް އެއަރޕޯޓުގައި އެމަނިކުފާނަށް މަރުޙަބާ ދެންނެވީ ދިވެހިރާއްޖޭގެ ޚާރިޖީ ވަޒީރު މޫސާ ޒަމީރު، އައްޑޫ ސިޓީގެ މޭޔަރު އަލީ ނިޒާރު، އަދި އައްޑޫ ހިތަދޫ މެދު ދާއިރާގެ މެންބަރު އަޙްމަދު އަޒާނެވެ.
މި ދަތުރުފުޅުގެ މައިގަނޑު މަޤްޞަދަކީ އިންޑިއާ ސަރުކާރުގެ އެހީތެރިކަމާއެކު އައްޑޫގައި ހިންގުނު މުހިންމު މަޝްރޫޢުތަކެއްގެ ނިމުން ފާހަގަކޮށް، އެ މަޝްރޫޢުތައް ދިވެހި ސަރުކާރާ ރަސްމީކޮށް ހަވާލުކުރުމެވެ.
މި މަޝްރޫޢުތަކުގެ ތެރެއިން އެންމެ ފާހަގަކޮށްލެވޭ އެއް މަޝްރޫޢަކީ ހަންކެޑެ ބްރިޖެވެ. މި އައު ބްރިޖަކީ ކުރިން ހަންކެޑެއާއި ގައުކެނޑި ގުޅުވާފައިވާ ބްރިޖުގެ ބަދަލުގައި ބޭނުންކުރާނެ ބްރިޖެކެވެ. މި ބްރިޖު ގުޅުވާލަނީ މަރަދޫ އަވަށުގެ ބޮޑުގެ މަގާއި ގައުކެނޑިއެވެ. އެފްކޮންސްއިން މި ބްރިޖު އެޅުމުގެ މަސައްކަތް ފެށީ 2021 ވަނަ އަހަރުއެވެ.
މީގެ އިތުރުން، އައްޑޫގެ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަޝްރޫޢުގެ ނިމުންވެސް މި ދަތުރުފުޅުގައި ފާހަގަކުރެއްވުމަށް ވަނީ ހަމަޖެހިފައެވެ.
މި ދަތުރުފުޅަކީ ދެ ޤައުމުގެ ގުޅުން އިތުރަށް ބަދަހިކޮށް، އިންޑިއާގެ އެހީތެރިކަމާއެކު ކުރިއަށްގެންދެވުނު ތަރައްޤީގެ މަޝްރޫޢުތަކުގެ މުހިންމުކަން ފާހަގަކުރުމުގެ ފުރުޞަތެއް ކަމުގައި ބެލެވެއެވެ.
