ހަމާސްގެ ލީޑަރާ ގުޅޭ މެލޭޝިޔާގެ ބޮޑުވަޒީރުގެ ޕޯސްޓްތައް ފޮހެލުމާ ގުޅިގެން މެޓާއިން މަޢާފަށް އެދިއްޖެއެވެ.
މިއީ ހަމާސްގެ ލީޑަރު އިސްމާޢީލް ހަނިޔާގެ އަވަހާރަވުމާ ގުޅޭގޮތުން މެލޭޝިޔާގެ ބޮޑުވަޒީރު އަންވަރު އިބްރާހީމް ސޯޝަލް މީޑިޔާގައި ކުރެއްވި ޕޯސްޓްތައް ފޮހެލުމާ ގުޅިގެންނެވެ.
މި މަޢާފަށް އެދުން އައީ، ބޮޑުވަޒީރުގެ ފޭސްބުކް އަދި އިންސްޓަގްރާމް ޕޯސްޓްތައް ފޮހެލި ސަބަބު ސާފުކުރުމަށް އަންވަރުގެ އޮފީހުން މެޓާގެ މަންދޫބުން ގެންނެވި ދުވަހުގެ އަނެއް ދުވަހުއެވެ. މެޓާ އަކީ މި ދެ މަޝްހޫރު ސޯޝަލް މީޑިޔާ ޕްލެޓްފޯމްގެ މައި ކުންފުންޏެވެ.
"އަޅުގަނޑުމެން މަޢާފަށް އެދެމެވެ. ބޮޑުވަޒީރުގެ ފޭސްބުކް އަދި އިންސްޓަގްރާމް ޕޭޖްތަކުގައި ހުރި ކޮންޓެންޓް ފޮހެލެވިފައިވަނީ އޮޕަރޭޝަނަލް އޮޅުމަކުންނެވެ،" މެޓާއިން އޭއެފްޕީއަށް އީމެއިލްކުރި ބަޔާނެއްގައި ބުނެފައިވެއެވެ. "އެ ކޮންޓެންޓް ވަނީ މިހާރު ރަނގަޅު ނިއުސްވާދީ ލޭބަލްއާއެކު އަނބުރާ ގެނެވިފައެވެ."
ފަލަސްޠީނުގެ ހަތިޔާރުއެޅި ގްރޫޕް ހަމާސްގެ ސިޔާސީ ލީޑަރު ޝަހީދު ކޮށްލާފައިވަނީ ބުދަ ދުވަހު އީރާނުގެ ވެރިރަށް ޓެހުރާނުގައެވެ. މިއީ އިސްރާއީލުގެ މައްޗަށް ތުހުމަތުކުރެވޭ ހަމަލާއެކެވެ. މި ކަމާ މެދު އިސްރާއީލުން ސީދާ އެއްޗެއް ބުނެފައެއް ނުވެއެވެ.
އަންވަރުގެ ޕޯސްޓްތަކުގައި ހިމެނެނީ ބޮޑުވަޒީރު ހަމާސްގެ އޮފިޝަލަކާއެކު ފޯނުގައި ވާހަކަދައްކަވާ، ހަމްދަރުދީ ފާޅުކުރައްވާ ވީޑިއޯއެކެވެ.
އިންސްޓަގްރާމްގައި، މެޓާއިން ލިޔެފައިވާ، އަންވަރު ހިއްސާކުރައްވާފައިވާ ނޯޓެއްގައި ވަނީ އެ ޕޯސްޓްތައް ފޮހެލާފައިވަނީ "ނުރައްކާތެރި ފަރުދުންނާއި ޖަމާޢަތްތަކާ" ގުޅުންހުރުމުގެ ސަބަބުން ކަމަށެވެ.
އަންވަރުގެ އޮފީހުން މި ޕޯސްޓްތައް ފޮހެލުން ސިފަކޮށްފައިވަނީ "ޚިޔާލު ފާޅުކުރުމުގެ މިނިވަންކަން ހަރުކަށި ގޮތެއްގައި މަނާކުރުން" ކަމަށް ބުނެ، ޓެކް ބެހެމޯތުގެ ކިބައިން މަޢާފަށް އެދުމަށް އެދިފައިވެއެވެ.
އަންވަރު ވަނީ ފާއިތުވި ހަފްތާގައި އޭނާގެ ޕޯސްޓްތައް ފޮހެލުމާ ގުޅިގެން މެޓާއަށް "ފިނޑިކަމުގެ" ތުހުމަތު ކުރައްވާފައެވެ.
އިސްރާއީލް، އެމެރިކާ އަދި ޔޫރަޕިއަން ޔޫނިއަނުން ހަމާސް ބަލަނީ ޓެރަރިސްޓް ޖަމާޢަތެއްގެ ގޮތުގައެވެ.
މޭ މަހު ޤަޠަރުގައި ހަނިޔާއާ ބައްދަލުކުރެއްވި އަންވަރު ވަނީ، އީރާނުގެ އެހީތެރިކަން ލިބޭ ފަލަސްޠީނުގެ މިލިޓަންޓް ގްރޫޕާއެކު މެލޭޝިޔާގެ ގުޅުން ދިފާޢުކުރައްވާފައެވެ. މި ގްރޫޕުން އޮކްޓޯބަރު 7 ގައި އިސްރާއީލަށް ދިން ހަމަލާއިން ޣައްޒާގެ ހަނގުރާމަ ފެށުނެވެ.
މާރިޗު މަހު ޖަރުމަނުވިލާތަށް ކުރެއްވި ދަތުރުފުޅެއްގައި އަންވަރު ވަނީ މެލޭޝިޔާގެ ގުޅުން އޮތީ ހަމާސްގެ ސިޔާސީ ފިޔަގަނޑާއެކު ކަމަށާއި، އެ ޖަމާޢަތުގެ އަސްކަރީ ބައިގައި ނޫން ކަމަށް ވިދާޅުވެފައެވެ.
