ސްޓެލްކޯ އާއި ގައުމީ ޔުނިވަރސިޓީ (އެމްއެންޔޫ) އާ ދެމެދު ކަރަންޓު ބޭނުންކުރުމާ ގުޅޭ މުހިންމު ދިރާސާއެއް ކުރުމަށް އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސްޓެލްކޯ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ހުސެއިން ފަހުމީ އެވެ. އެމްއެންޔޫގެ ފަރާތުން ސޮއިކުރެއްވީ އެ ޔުނިވަރސިޓީގެ ވައިސް ޗާންސެލަރ ޑރ. އާއިޝަތު ޝެހެނާޒް އާދަމް އެވެ.

މި ދިރާސާގެ މައިގަނޑު މަޤްޞަދަކީ ބިލްކުރުމުގައި ދިމާވާ މައްސަލަތަކުގެ އަސްލު ސަބަބުތައް ބަލައި، ކަރަންޓު ބޭނުންކުރާ ގޮތްތަކާއި މޫސުމީ ބަދަލުތަކުގެ އަސަރު ދެނެގަތުމެވެ. އަދި ބިލްކުރުމުގެ ނިޒާމުގެ ހާމަކަމާއި ސައްޙަކަން އިތުރުކޮށް، ކަސްޓަމަރުންގެ ހިތްހަމަޖެހުން އިތުރުކުރުމަށް އިސްތިރާޖުތައް އެކުލަވާލުމެވެ. މި ދިރާސާގައި ފާއިތުވި 10 އަހަރުގެ މަޢުލޫމާތު ބޭނުންކުރާނެ ކަމަށް ސްޓެލްކޯއިން ބުނެފައިވެއެވެ.

ދިރާސާގެ މުހިންމު ބައިތަކުގެ ތެރޭގައި:
– އެކި ބާވަތުގެ ކަސްޓަމަރުން ކަރަންޓު ބޭނުންކުރާ ގޮތްތައް ދެނެގަތުން
– އެންމެ ގިނައިން ކަރަންޓު ބޭނުންކުރާ ވަގުތުތަކާއި މޫސުމީ އަސަރު ދިރާސާކުރުން
– ކަރަންޓު ބިލްތަކުގެ ސައްޙަކަން ކަށަވަރުކުރުން
– ބިލްކުރުމުގައި މައްސަލަތަކެއް ހުރިނަމަ އެކަން ދެނެގަނެ އަދަދުކުރުން
– ކަސްޓަމަރުންނަށް ހަރަދު ކުޑަކުރެވޭނެ ގޮތްތައް ހޯދުން
– ބިލާ ގުޅޭ ކަސްޓަމަރުންގެ ޝަކުވާތަކާއި ޚިޔާލުތައް ދެނެގަތުން
– ކުންފުނީގެ އިސްތިރާޖުތައް ކަނޑައެޅުމަށް އެހީތެރިވުން

މި ދިރާސާއިން ލިބޭ މަޢުލޫމާތު ބޭނުންކޮށްގެން ސްޓެލްކޯއަށް އިތުރު ކުރިއެރުންތަކެއް ހޯދައި، ކަސްޓަމަރުންނަށް ދެވޭ ޚިދުމަތް ރަނގަޅުކުރުމަށް މަގުފަހިވާނެ ކަމަށް ބެލެވެއެވެ.