ސަރުކާރުގެ އަމާޒަކީ އާޓިސްޓުންގެ އުފެއްދުންތައް ބައިނަލްއަގުވާމީ މާރކެޓްގައި ވިއްކޭނެ ފުރުސަތު ފަހިކޮށްދިނުންކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މިކަން ހާމަކޮށްފައިވަނީ މޯލްޑިވްސް އާޓިސްޓް ކޮމިއުނިޓީ ވީޝަންއަށް ޒިޔާރަތް ކުރައްވާ މިރޭ ވާހަކަ ދައްކަވަމުންނެވެ.
މިރޭގެ ހަފްލާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ސަރުކާރުން މަސައްކަތް ކުރަމުންދަނީ އާޓިސްޓުންގެ ޖަމިއްޔާއަށާއި، އާޓިސްޓުންގެ ގޮތުގައި މަސައްކަތްކުރާ ވަކިވަކި ފަރުދުންނަށްވެސް ހިލޭ އެހީގެ ފުރުސަތު ހޯދާދިނުމަށް ސަރުކާރުން މަސައްކަތް ކުރަމުންދާކަމަށެވެ.
އޭގެ އިތުރުން އާޓިސްޓުންގެ މަސައްކަތްތައް އެގްޒިބިޓްކުރާނެ ދާއިމީ ޖާގަ މާލެއާއި ހުޅުމާލޭގައިވެސް ހަމަޖައްސާ ދިމުނުމުގެ އިތުރުން އާޓިސްޓުންނަށް މަސައްކަތް ކުރެވޭނެ ސްޓީޑިއޯ ފެސިލިޓީ ހުޅުމާލޭގައި ހަމަޖެހިގެންދާނެކަމަށްވެސް ރައީސް މުއިއްޒު ވިދާޅުވިއެވެ.
އެގޮތުން ރާއްޖެއާއި ރާއްޖެއިން ބޭރުގަވެސް މައުރަޒުތައް ހިންގޭނެ ފުރުސަތުން ސަރުކާރުން އާޓިސްޓުންނަށް ފަހިކޮށްދޭނެކަމިގައި ރައީސް ވިދާޅުވިއެވެ.
ރައީސް ވިދާޅުވީ ރާއްޖެ ކުރިއަރައިގެން ދާނީ ޒުވާން ސިކުނޑިތައް ކުރިއަރައިގެންދާނެ ފުރުސަތު ފަހިކޮށްދީގެން ކަަމަށާއި، އެކަމަށްޓަކާ ޒުވާން އާޓިސްޓުންގެ އެއްބާރުލުން ސަރުކާރަށް ބޭނުންވާ ކަމުގައެވެ.
