އިއްޔެ ނިޔާވި ހުސައިން ޝަރީފް (ބޮލިފުށީ ޝަރީފް) އަކީ ނިކަމެތީންނަށާއި ޖަމާއަތްތަކަށް އެހީތެރިކަން ފޯރުކޮށްދެއްވުން ފަދަ ކަންކަމުގައި އިޙްސާންތެރި ބޭފުޅެއްކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހުސައިން ޝަރީފް ކުއްލި ގޮތަކަށް އިއްޔެ އަވަހާރަވުމާއި ގުޅިގެން ފޮނުއްވި ތައުޒިޔާގެ މެސެޖުގައެވެ.
ރައީސް ޑރ. މުއިއްޒު ވިދާޅުވީ ހުސައިން ޝަރީފަކީ ފަތުރުވެރިކަމާއި ވިޔަފާރީގެ ދާއިރާގައި ތަޖްރިބާކާރު ޤައުމީ ހިދުމަތްތެރިއެއްކަމަށެވެ. އަދި ނިކަމެތިންނަށް އެހީވުމުގައިވެސް ޝަރީފަކީ އިހްސާންތެރި ބޭފުޅެއްކަމަށް ރައިސް މުއިއްޒު ވިދާޅުވިއެވެ.
ޝަރީފް އިއްޔެ މެންދުރުގެ ފަރިއްކޮޅަށް ފަހު ކޮޓަރިއަށް ވަޑައިގަތް ފަހުން ކޮޓަރި ތެރެއަށް ވެއްޓިފައި އޮއްވައި ފެނުނީ އޭނާގެ ބަޓްލަރަކަށެވެ. އިމަޖެންސީގައި އައިޖީއެމްއެޗަށް ގެންގޮސް ފަރުވާދެމުން ދަނިކޮށް ޝަރީފު އަވަހާރަވީ އިއްޔެ ހަވީރުގެ ވަގުތެއްގައެވެ.
ޝަރީފަކީ ކ. ބޮލިފުށި ކުއްޔަށް ނަގާފައިވާ ގޭޓްވޭ މޯލްޑިވްސް ކުންފުނީގެ މައި ހިއްސާދާރެވެ. އެ ކުންފުނި އުފައްދާފައި ވަނީ 1994ގަ އެވެ.
ސޯސަންމަގުގައި ހުންނަ އިބްރާހިމް މިސްކިތަކީ ވިޔަފާރީގައި ފާހަގަކޮށްލެވުނު ޝަރީފު ބިނާކުރެއްވި މިސްކިތެވެ. އޭނޫން ވެސް ވަރަށް ގިނަ މިސްކިތްތަކުގެ އާބާތުރަފިލުވުމާ އެ ނޫން ކަންކަމުގައި އޭނާގެ ބައިވެރިވުން ބޮޑެވެ.
ޝަރީފަކީ ވެލާނާ އިންޓަނޭޝަނަލް އެއާޕޯޓް ވީއައިއޭ ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދުގެ ބޭބެއެވެ.
