ނިމިދިޔަ ސަރުކާރުގައި ކޮރަޕްޝަންގެ އަމަލުތައް ހިންގި ނަމަ، ވެރިކަމުން ފޭބުމަށްފަހު އެމްޑީޕީ ސަރުކާރުގެ އިސްވެރިންނަށް "މިހެނެއް" ނުތިބެވޭނެ ކަމުގައި ކުރީގެ ރައީސް ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި މިއަދު ވާހަކަ ދައްކަވަމުންނެވެ.
އެ ޕްރޮގްރާމްގައި ވާހަކަ ދައްކަވަމުން ރައީސް ސާލިޙު ވިދާޅުވީ، އެމަނިކުފާނުގެ ބޭނުންފުޅުވަނީ "މޫނަށް ކަނދުރާއަށް" ބެއްލެވުމެއް ނެތި މައްސަލަތައް ބެއްލެވުން ކަމަށެވެ.
އަޅުގަނޑުމެން އެއްވެސް ވަރަކަށް ކަންބޮޑުވުމެއް ނެތް އިނގޭތޯ، އަޅުގަނޑު ނޯންނާނެ ބައި ލާރިއެއްގައިވެސް، ބައި ސެންޓުގައި ޖެހިފައެއްވެސް، ބައްލަވަންވީ، ބައްލަވާފައި ކަމެއް އޮވެއްޖެއްޔާ ކުރިއަށް ގެންދަވަންވީ، އަޅުގަނޑަށް ހަމަ ޔަގީން އިރާދު ކުރެއްވިއްޔާ އަޅުގަނޑުގެ، އަޅުގަނޑެއް ނޫން އަޅުގަނޑުގެ ސަރުކާރުގެވެސް އެ ތިއްބެވި ބޭފުޅުން ގެ އެފަދަ ކަމެއް ނުފެންނާނެ، ކޮށްފައެއް ނޯންނާނެ އަޅުގަނޑުމެންނެއް، އެހެންނަމަ މިހެނެއް ނޫން އަޅުގަނޑުމެން ތިބޭނީ ވެރިކަމުން ފައިބައިގެން، މޫނަކަށް ކަނދުރާއަކަށްވެސް ބައްލަވާނެ ކަމެއް ނެތް.
ރައީސް ސާލިހު ވިދާޅުވިއެވެ.
މި ޕްރޮގްރާމްގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކުފާނުގެ އިތުރުން، އެމަނިކުފާނުގެ ސަރުކާރުގެ އިސް ބޭފުޅަކުވެސް އެފަދަ ކަމެއް ކުރައްވާފަ ނޯންނާނެ ކަމަށާއި، އެފަދަ އަމަލެއް އެއިން ބޭފުޅަކު ކުރައްވާފަ އޮތްނަމަ އެބޭފުޅުން ވެރިކަމުން ފައިބައިގެން ތިއްބަވާނީ "މިހެނެއް ނޫން" ކަމުގައެވެ.
އެމަނިކުފާނުގެ ސަރުކާރުގެ އިސް އެއްވެސް ބޭފުޅަކު ކޮރަޕްޝަންގެ އަމަލެއް ހިންގާފަ ނުވާނެކަމަށް ރައީސް ސާލިހު ވިދާޅުވިއިރު، އެމަނިކުފާނުގެ ސަރުކާރުގައި ފެނަކަ ކޯޕަރޭޝަންގައި ހިންގާފައިވާ ކޮރަޕްޝަންގެ އަމަލުތައް ބެލުމަށް ގޮވާލާ ކުއްލި މައްސަލައެއް މިއަދުގެ ރައްޔިތުންގެ މަޖިލީހަށް ވަނީ ހުށަހަޅާފައެވެ.
