ދިވެހި ފުލުހުންގެ ޚިދުމަތާއި ޔޫ.އެން.އޯ.ޑީ.ސީ ގުޅިގެން ކުރިއަށް ގެންދިޔަ އައުޓް ބޯޑު އިންޖީނު މެއިންޓެނެންސް ކޯހުގެ ތިންވަނަަ ބުރު ނިންމައި ބައިވެރިންނަށް ސެޓްފިކެޓް ދިނުމުގެ ރަސްމިއްޔާތު ބާއްވައިފިއެވެ.
ކޯސް ނިންމުމަށް ދޫނިދޫގައި މިއަދު ބޭއްވި ރަސްމިއްޔާތު ޝަރަފުވެރި ކޮށްދެއްވީ މެރިން ޕޮލިހުގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް އިބްރާހީމް އަދުނާން އަނީސްއެވެ. މި ރަސްމިއްޔާތުގައި، ޔޫ.އެން.އޯ.ޑީ.ސީގެ އެސިސްޓެންޓް ޕްރޮގްރާމް އޮފިސަރ ބުއްދިކާ ދަނަންޖި ރަނަދީރާ އަދި އިންސްޓްރަކްޓަރ މރ. ނޯމަން ކިޓޮންގަ ކިކަމީ ބައިވެރިވެލެއްވިއެވެ.
މި ރަސްމިއްޔާތުގައި، ޗީފް ސުޕްރިންޓެންޑެންޓް އޮފް މެރިން ޕޮލިސް އިބްރާހީމް އަދުނާން އަނީސް ދެއްކެވި ވާހަކަފުޅުގައި، މިފަދަ ކޯސްތައް ރާވައި މި ޚިދުމަތާއި ލޯ އެންފޯސްމަންޓު އެހެނިހެން މުއައްސަސާތައް ބައިވެރިކޮށްގެން ހިންގަމުންދާތީ ޔޫ.އެން.އޯ.ޑީސީއަށް ޝުކުރު އަދާކުރެއްވިއެވެ. އަދި މިފަދަ ކޯސްތަކުގެ މުހިންމުކަމާއި ކަނޑުމަތިން، އުޅަނދުގެ އިންޖީނަށް ދިމާވާ މައްސަލަތައް ހައްލުކުރުމުގެ ހުނަރާއި އުކުޅުތައް ދަސްވެގެން ދިއުމަކީ ކަނޑުމަތީގައި މަސައްކަތްކުރާ ފުލުހުންނަށް ލިބިގެންދިޔަ ފުރިހަމަ ބޭނުންތެރި ތަޖުރިބާއެއް ކަމަށް ވިދާޅުވިއެވެ.
މެއި 26 އިން 30 އަށް ކުރިއަށް ގެންދިޔަ މިކޯހުގައި ދިވެހި ފުލުހުންގެ ޚިދުމަތުގެ އަށް މުވައްޒަފުންނާއި މޯލްޑިވްސް ކަސްޓަމްސް ސަރވިސްގެ ދެ މުވައްޒަފުން ބައިވެރިވިއެވެ.
މި ކޯހުގައި، އުޅަނދު ޗެކްކުރުމުގައި ބަލަންޖެހޭ މުހިންމު ކަންތައްތަކާއި އިންޖީނުތަކަށް އާންމުކޮށް ދިމާވާ މައްސަލަތަކާއި އެކަންކަން ހައްލުކުރުމަށް ދަސްކޮށްދީފައިވެއެވެ. އަދި ކަނޑުމަތީގައި އިންޖީނަށް މައްސަލައެއް ދިމާވެއްޖެނަމަ ހައްލުކުރާނެގޮތާއި އިތުރަށް މައްސަލަ ގޯސްވިޔަ ނުދީ ހިކިފަސްތަނަކާ ހަމައަށް އުޅަނދު ގެންދިއުމަށް ކުރަންޖެހޭ އަދި ކުރެވިދާނެ ކަންކަމާއި އިތުރަށް އެނގެންޖެހޭ އެހެނިހެން ކަންކަމާ ގުޅޭގޮތުން މައުލޫމާތު ދީފައިވެއެވެ.
ކޮމެންޓު ފޮނުވާ