ރައްޔިތުންގެ މަޖިލީހާ ސަރުކާރާ ޖެހޭކަށް އެއްވެސް ޖާގައެއް ނުދެއްވާނެކަމުގައި މަޖިލިހުގެ ރައީސްކަމަށް އައްޔަންކުރުމަށް ޕީއެންސީން ނިންމާފައިވާ، ލ. ފޮނަދޫ ދާއިރާގެ އިންތިޚާބީ މެމްބަރު އަބުދުއްރަހީމް ވިދާޅުވެއްޖެއެވެ.
ދައުލަތުގެ މީޑިއާއިން ގެނެސްދޭ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން އަބުދުއްރަހީމް ވިދާޅުވެފައިވަނީ އެއްވެސް ކަހަލަ މައްސަލައެއް ނުޖެހި ޕާޓީވެސް ހިންގޭނަކަމަށާއި، ސަރުކާރާ އެކީގަ ކުރިޔަށް ދެވޭނެކަމުގައެވެ. އަދި އަބުދުއްރަހީމް ވިދާޅުވީ އޭނާއާ ރައީސް މުއިއްޒުއާއި އެއްވެސް މައްސަލައެއް ކުރިމަތި ނުވާނެކަމަށާއި، އަދި މަޖިލިހާ ސަރުކާރާ ޖެހެން ޖާގަވެސް ނުދެއްވާނެ ކަމަށެވެ.
އަޅުގަނޑާ ރައީސް ޑރ. މުޢިއްޒާ ދޭތެރޭ އިރާދަކުރެއްވިއްޔާ އެއްވެސް މައްސަލައެއް ދިމާ ނުވާނެ. މަޖިލީހާ ސަރުކާރާ ޖެހޭކަށް އަޅުގަނޑުމެން ޖާގައެއް ނުދޭނަން. އެއަށްވުރެ ބޮޑަށް ގުޅިގެން އެކީގައި މަސައްކަތްކުރާނީ. އޭގެ މާނައަކީ ދެބާރު އެއްވަނީއެކޭ ނޫން.
ޢަބްދުއްރަޙީމް ވިދާޅުވިއެވެ.
އަބުދުއްރަހީމް ވިދާޅުވީ އޭގެ މާނައަކީ ދެބާރު އެއްވުމެއް ނޫން ކަމަށާއި ރައްޔިތުންގެ މަޖިލީހުގެ ބޮޑު އަޣަލަބިއްޔަތެއް ސަރުކާރު ހިންގާ ޕާޓީއަށް ދިނީ ރައްޔިތުންގެ އުންމީދުތަކެއް އެޕާޓީއާއި މިހާރުގެ ވެރިކަމާއި، އަދި އަދުގެ ރައީސުލްޖުމްހޫރިއްޔާއާއި ގުޅިފައިވާތީކަމަށެވެ.
