ބޮލީވުޑްގެ ކުރީގެ މަޝްހޫރު ދެ ތަރިން ކަމުގައިވާ ޕޫޖާ ބަޓް އާއި ސުނިލް ޝެޓީ 27 އަހަރު ފަހުން އެކުގައި ފިލްމެއް ކުޅެން ނިންމައިފި އެވެ.
ޕޫޖާ އާއި ސުނިލް ޝެޓީ އެކުގައި ފެނިގެންދިޔަ ފިލްމަކީ 1997 ވަނަ އަހަރު ރިލީޒްކުރި "ބޯޑާ" އެވެ. މިފިލްމަކީ ގިނަ ބައެއްގެ މެދުގައި މަގުބޫލު ފިލްމެކެވެ. އެއާއި އެކުގައި މީގެ ދެވަނަ ބައެއް އަންނަނީ ހަދަމުންނެވެ. އެފިލްމް ރިލީޒް ކުރުމަށް ނިންމައިފައިވަނީ 2026 ގައިއެވެ.
ރިޕޯޓްތައް ބުނި ގޮތުގައި، ޕޫޖާ އާއި ސުނިލް ދެން ފެންނާނީ އެކްޝަން ތުރިލާ ފިލްމަކުންނެވެ. ނަމަވެސް އެ ފިލްމުގެ ނަން އަދި އިއުލާންކޮށްފައެއް ނުވެ އެވެ. އެ ފިލްމަކީ ލަޔަންސްގޭޓް އިންޑިއާ އިން ޕްރޮޑިއުސްކުރާ ފިލްމެކެވެ.
View this post on Instagram
އެ ފިލްމުގެ ޝޫޓިން މިހާރު ފަށާފައިވާ އިރު، ޕޫޖާ ވަނީ ޝޫޓިންގެ ތެރެއިން ނަގާފައިވާ އޭނާގެ ފޮޓޯއެއް އިންސްޓަގްރާމްގައި ހިއްސާކޮށްފަ އެވެ. މިފިލްމު ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.
ޕޫޖާ އަކީ 1990 ގެ އަހަރުތަކުގައި ބޮލީވުޑްގައި ވަރަށް ގަދަޔަށް ވިދާލި ބަތަލާ އެކެވެ. އޭނާ ބޮޑަށް މަޝްހޫރުވެގެން ދިޔައީ އޭނާގެ ރީތިކަމާއި އެއްވަރަށް އެކްޓް ކުރުމުގެ ހުނަރުގެ ސަބަބުންނެވެ.
އެކްޓްކުރުމުގެ އިތުރުން ޑައިރެކްޝަންގެ މަސައްކަތް ވެސް ޕޫޖާ ކޮންމެވެސް ވަރަކަށް ދަނީ ކުރަމުންނެވެ.
