މިއަހަރުގެ ފުރަތަމަ ތިން މަސް ދުވަހުގެ ތެރޭގައި އާސަންދަ ސްކީމުގެ ދަށުން 838 މިލިއަން ރުފިޔާ ޚަރަދު ކޮށްފައިވާކަމަށާއި މި އަދަދަކީ ނިމިދިޔަ އަހަރުގެ މި މުއްދަތާ އަޅާބަލާއިރު 4.8 އިންސައްތައިގެ އިތުރުވުމެއް ކަމުގައި އާސަންދަ ކުންފުނިން ބުނެފިއެވެ.
އެކުންފުނިން ބުނެގައިވަނީ 2023 ވަނަ އަހަރާ އަޅާ ބަލާއިރު، މިއަހަރުގެ ފުރަތަމަ ތިން މަސްދުވަހުގެ ތެރޭގައި އާސަންދަ ސްކީމުގެ ދަށުން ޞިއްޙީ ޚިދުމަތް ހޯދި ފަރާތްތަކުގެ އަދަދު ވަނީ ބޮޑުތަން އިތުރުވެފައި ކަމަށެވެ.
އާސަންދަ ކޮމްޕެނީން ބުނީ 2024 ވަނަ އަހަރުގެ ޖެނުއަރީ މަހުން ފެށިގެން މާޗު މަހުގެ ނިޔަލަށް، އާސަންދަ ސްކީމުގެ ދަށުން ޖުމްލަ 276,439 މީހުން ޞިއްޙީ ޚިދުމަތް ހޯދާފައިވާކަމަށެވެ. މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 3,005 މީހުންގެ އިތުރުއަދަދެއްކަމަށް އެ ކުންފުނީގެ ތަފާސް ހިސާބުތަކުން ދައްކައެވެ. 2023 ވަނަ އަހަރުގެ ފުރަތަމަ ތިން މަސްދުވަހުގެ ތެރޭގައި ޚިދުމަތް ހޯދާފައިވަނީ 273,434 މީހުންނެވެ.
މީގެ އިތުރުން، ފާއިތުވި އަހަރުގެ ފުރަތަމަ ތިން މަހާ އަޅާބަލާއިރު މިއަހަރު އާސަންދައިން ޚިދުމަތް ހޯދި މީހުންގެ އަދަދު ވެސް ވަނީ އިތުރުވެފައެވެ. އެގޮތުން 276,439 މީހުން ޚިދުމަތް ހޯދާފައިވާއިރު، ނިމިދިޔަ އަހަރު ޚިދުމަތް ހޯދާފައިވަނީ 273,434 މީހުންނެވެ.
އިމަރޖެންސީ ހާލަތްތަކުގައި އާސަންދައިގެ ފަރާތުން ބަލިމީހުން ރަށުން ރަށަށް 1599 ފަހަރު ގެންގޮސްދީފައިވާއިރު، ރާއްޖެއިން ބޭރުގައި ފަރުވާ ހޯދުމަށް 1691 މީހުން ފޮނުވާފައިވެއެވެ.
އަދި މީގެ އިތުރުން، އާސަންދަ ސްކީމުގައި ހިމެނޭ ގޮތަށް ހިލޭ މެޑިކަލް ޗެކަޕްގެ އިންތިޒާމް ވެސް ވަނީ ހަމަޖައްސާފައެވެ.
ސިއްޙީ ދާއިރާގައި ކުރަންޖެހޭ ޚަރަދު ދަނީ ދުވަހެއް ދުވަހަކަށް އިތުރުވަމުންނެވެ. އެހެންކަމުން ރާއްޖެ އާއި ރާއްޖެއިން ބޭރުގައި ދެވޭ ސިއްޙީ ޚިދުމަތްތަކުގެ އަގުތައް މުރާޖަޢާކުރުމުގެ މަސައްކަތް އާސަންދަ ކުންފުނިން އަންނަނީ މަސައްކަތް ކުރަމުންނެވެ.
