މިދިއަ މަހުގެ ފަތިހުގެ ވަގުތެއްގައި ބޮލީވުޑްގެ މަޝްހޫރު އެކްޓަރު ސަލްމާން ހާން ދިރިއުޅޭ ގެ ގެލެކްސީއަށް ދިން ބަޑީގެ ހަމަލާގެ ތުމުމަތުގައި ހައްޔަރުކުރި ދެ މީހުންގެ ތެރެއިން އެކަކު ޖަލުގައި މިއަދު އަމިއްލަ އަށް މަރުވާން އުޅުނު ހާދިސާއަކާ ގުޅިގެން އޭނަގެ ހާލު ދެރަވެ ހޮސްޕިޓަލްގައި ފަރުވާ ދެމުން ދަނިކޮށް މަރުވެއްޖެ އެވެ.

ފަތިހު ފަހެއް ޖަހާކަށް ހާއިރު ދިން މި ހަމަލާގައި ދެ މީހަކު ބައިވެރިވި އެވެ. އެ މީހުން ޖެހި ބަޑީގެ ވަޒަންތައް އެރީ ސަލްމާން ގޭގެ ފާރަށް ކަމަށް ރިޕޯޓްތައް ބުނެއެވެ. އެހަމަލާ ދިންތާ ދެދުވަހެއްގެ ތެރޭގައި ތުމަތަށް ދެމީހަކު ހައްޔަރު ކުރިއެވެ.

މީޑިއާތަކުން ބުނީ މަރުވީ އަނޫޖް ތަޕަން، 32، ކަމަށެވެ. މީޑިއާތަކުން ބުނީ މިއަދު މެންދުރު ފަހު އޭނަ އަމިއްލަ އަށް މަރުވާން މަސައްކަތްކުރީ ބަންދުކޮށްފައި އިން ގޮޅީގެ ފާހާނާ ތެރޭގައި ބެޑްޝީޓަކުން ދަންޖެހިގެން ކަމަށެވެ. ފުލުހުންނަށް މިކަން އެނގުމާ އެކީ އޭނަ ސަލާމަތްކޮށް ވަގުތުން ހޮސްޕިޓަަލަށް ގެންގޮސް ފަރުވާ ދޭން ފެށި އެވެ. އަނޫޖް މަރުވީ އައިސީޔޫގައި ފަރުވާ ދެމުން ދަނިކޮށެވެ.

މިދިޔަ މަހުގެ 14 ވަނަ ދުވަހުގެ ވަރަށް ފަތިހުގެ ވަހުތެއްގައި ސަލްމާންގެ ގެއަށް ބަޑިން ހަމަލާތަކެއް ދިން މައްސަލައިގައި މުމްބާއީގެ ކްރައިމް ބްރާންޗްގެ ފޮރެންސިކް ޓީމަކުން ހަރަކާތްތެރި ވި އިރުގައި މި ހަމަލާއާ ގުޅިގެން ސަލްމާންގެ ގޭގެ ސެކިއުރިޓީ ވެސް އަދި އޭނާގެ ސެކިއުރިޓީ ވެސް ވަނީ ވަރަށް ބޮޑަށް ވަރުގަދަކޮށްފައިއެވެ.