ދިވެހިރާއްޖެއަކީ މިއީ މިނިވަން މުސްތަގިއްލު ގައުމެއްކަން ބޭރު ދުނިޔެއަށް މިހާރު ސާފުވާން ވާނެކަމުގައި ރައީސް މުއިއްޒު ވިދާޅުވެއްޖެއެވެ.
ނިމިދިޔަ މަޖިލިސް އިންތިޚާބުގައި ވެރިކަންކުރާ ޕީއެންސީއަށް ލިބުނު ކާމިޔާބީ ފާހަގަކުރުމަށް މިރޭ އާރޓިފިޝަލް ބީޗް ސަރަހައްދުގައި ބޭއްވުނު އެއްވުމުގައި ވާހަކަ ދައްކަވަމުން ރައީސް މުއިއްޒު ވިދާޅުވީ ކަންކަން ބަލަން ތިއްބެވި ބޭރު ދުނިޔޭގެ ގައުމުތަކަށްވެސް ރައްޔިތުން ބޭނުންވާކަންކަން މިހާރު ސާފުވާން ވާނެ ކަމުގައެވެ. އަދި ދިވެހިން ބޭނުންވަނީ ދިވެހީންގެ ކަންކަން ދިވެހިން ނިންމަންކަން ބޭރުދުނިޔެއަށް ސާފުވާނެކަމަށްވެސް ރައީސް ވިދާޅުވިއެވެ.
މުޅި އިންޓަރނޭޝަނަލް ކޮމިއުނިޓީގެ ހުރިހާ ފަރާތްތަކަށްވެސް މިހާރު ސާފުވާންވާނެ، އަޅުގަޑުމެން ބޭނުންވަނީ އަޅުގަޑުމެންގެ ކަންކަން އަޅުގަޑުމެން އަމިއްލައަށް ނިންމަންކަން، އަޅުގަޑުމެންނަށް މުހިންމީ ދިވެހީންގެ ކަންކަމަށް ދިވެހީން ބަސްބުނެ ދިވެހީން ބޭނުންވާ ގޮތަށް ކުރަންކަން މިހާރު ވަރަށް ސާފުވާނެ. އަދި އަޅުގަޑުމެންގެ އެތެރެގަތިބި އެބަޔަކު ވަކި އެޖެންޑާއެއް ގެންގުޅުއްވަން އުޅުއްވި ބޭފުޅުންނަށްވެސް ވަރަށް ސާފުވެވަޑައިގަންނަވާނެ.
ރައީސް މުއިއްޒު ވިދާޅުވިއެވެ.
މިރޭގެ އިވެންޓުގައި ރައީސް މުއިއްޒު ވިދާޅުވީ ދެން އޮތީ މަސައްކަތުގެ ދުވެލި އަވަސްކުރުން ކަމަށާއި، ފާއިތުވި 5 މަސްދުވަހުގެ މަސައްކަތްތައް ދިޔައީ ވަރަށް ދަތި އުދަގުލުގައި ކަމުގައެވެ.
ރައީސް މުއިއްޒު ވިދާޅުވީ ފާއިތުވި 5 މަސްދުވަހަކީ އެއްވެސް އެއްޗެއް ނޫންކަމަށާއި، ކެބިނެޓް ވަޒީރުންނާއި ކުންފުނިތަކުގެ އެމްޑީން ދެން އުޅުއްވަންވާނީ 24 ގަޑިއިރު ހޭލާކަމުގައެވެ. ރައީސް މުއިއްޒު ވިދާޅުވީ ގެދޮރު ނެތުމުގެ ހިތްދަތިކަން މާޒީއާއެކު ވެގެން ދާނެކަމަށާއި، އެމަސައްކަތް ކާމިޔާބު ކުރައްވާނެ ކަމުގައެވެ.
ރައީސް މުއިއްޒު ވިދާޅުވީ މުޅި ގައުމު އެކައްޗެއް ކިޔާ ދިން މެސެޖަކީ ތިމްނަންމެން ބޭނުންވަނީ ހުސް ވާހަކަ ދެއްކުން ނޫންކަމަށާއި، ބޭނުންވަނީ އަމަލުން ކަންކަން ވާކަން ދެއްކުން ކަމުގައެވެ. އަދި ރައީސް ވިދާޅުވީ އަމަލީ ގޮތުން ކުރާ މަސައްކަތް ފެނިގެންދާނެ ކަމަށާއި، "މިޓީމް" ދެމި ތިބޭނީ މަސައްކަތުގައި ކަމުގައެވެ.
ރައީސް މުއިއްޒު ވިދާޅުވީ ބޭނުންފުޅުވަނީ ޚިޔާލުތަފާތުވުން ދޫކޮށްލާ ހުރިހާ ސިޔާސީ ޕާޓީތަކަށްވެސް އެއްބައެއްގެ ގޮތުގައި ކުރިޔަށް ދިއުން ކަމުގައެވެ. އަދި ރައީސް ވަނީ ހުރިހާ ސިޔާސީ ޕާޓީތަކަށާއި އެޕާޓީތަކުގެ ލީޑަރުންނަށާއި މެމްބަރުންނަށްވެސް އެންމެން އެކީގައި ކުރިޔަށް ދިއުމަށް ގޮވާލައްވާފައެވެ.
ރައީސް މުއިއްޒުގެ ވާހަކަފުޅަސްފަހު މިރޭ އޮތީ ބަޑިބޭހުގެ ކުޅިވަރުތަކެވެ. މިރޭގެ އުފާފާޅުކުރުމުގެ ޖަލްސާ ނިންމާލާފައިވަނީ ކުރެވުނު ޚާއްސަ ދުއާއަކުންނެވެ.
