ފަސްޓު ލޭޑީ މެޑަމް ސާޖިދާ ވޯޓު ލައްވައިފިއެވެ. އެކަމަނާ ވޯޓުލައްވާފައި ވަނީ އަމީނިއްޔާ ސްކޫލްގައި ހުރި ވޯޓު ފޮއްޓަކަށް.
ރައީސް މުއިއްޒުވެސް ވަނީ މިއަދު ވަރަށް ހެނދުނާ ވޯޓު ލައްވާފައެވެ. މިއަދު ހެނދުނު 08:00 ގައި ރައްޔިތުންގެ މަޖިލީހުގެ އިންތިހާބުގެ ވޯޓްލުން ފަށާފައިވާއިރު، ރައީސް ވަނީ ތާޖުއްދީން ސްކޫލުގައި ބެހެއްޓިފައިވާ ވޯޓު ފޮށްޓަކަށް ވޯޓް ލައްވާފައެވެ.
ވޯޓް ލެއްވުމަށްފަހު މީޑިއާއާ ވާހަކަދައްކަވަމުން ރައީސް ވަނީ، ވޯޓުލުމަކީ ކޮންމެ ރައްޔިތަކަށްވެސް ޤާނޫނުއަސާސީން ލިބިދީފައިވާ ހައްގަކާއި ޒިންމާއެއްކަން ހަނދާންކޮށްދެއްވާފައެވެ. އެހެންކަމުން ހުރިހާ ރައްޔިތުންވެސް ވީހާވެސް އަވަހަކަށް ނިކުމެ، ވޯޓުލުމުގެ ހައްގު އަދާކުރުމަށް ރައީސް އެދިވަޑައިގެންނެވިއެވެ.
ރައީސް ވަނީ، ހަވީރު ވަންދެން މަޑުނުކޮށް އަވަހަށް ވޯޓްލުމަށް އިލްތިމާސްކުރައްވާފައެވެ.
މިއަދުގެ ވޯޓްލުން ކުރިޔަށްދާނީ ހަވީރު 05:30ގެ ނިޔަލަށެވެ.
20 ވަނަ މަޖިލީސް އިންތިޚާބުގައި މަޖިލީހުގެ ޖުމުލަ 93 ދާއިރާއަކަށް މެންބަރުން ހޮވާނެއެވެ. އެ އިންތިޚާބުގައި ޖުމުލަ 368 ކެންޑިޑޭޓުން ވާދަކުރާއިރު، ޕާޓީތަކުގެ ތެރެއިން އެންމެ ގިނަ ކެންޑިޑޭޓުން ވާދަކުރަނީ އިދިކޮޅު އެމްޑީޕީންނެވެ. ދެވަނައަށް އެންމެ ގިނަ ކެންޑިޑޭޓުން ވާދަކުރަނީ ވެރިކަން ކުރާ ޕީޕީއެމް/ޕީއެންސީ ކޯލިޝަނުންނެވެ.
އިންތިޚާބުގައި ވޯޓުލުމަށް 602 ވޯޓުފޮށި ބަހައްޓާފައިވެއެވެ. އޭގެ ތެރެއިން މާލެ ސަރަހައްދުގައި 241 ވޯޓުފޮށި ބަހައްޓާފައިވެއެވެ. ސީދާ މާލޭގައި 181 ވޯޓުފޮށި ބަހައްޓާފައިވާއިރު ހުޅުމާލޭގައި 51 ވޯޓުފޮށި ބަހައްޓާފައިވެއެވެ.
