އެމްޑީޕީން މަސައްކަތް ކުރަނީ ސަރުކާރު ޖަވާބުދާރީކުރުވުމުގެ ނަމުގައި ސަރުކާރު ވައްޓާލުމަށް ކަމަށާއި، ޖަވާބުދާރީ ކުރުވުން އިދިކޮޅު ފަރާތްތަކުން މާނަކުރަމުންދަނީ ސަރުކާރު ބަދަލު ކުރުމަށްކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޕީއެންސީގެ މަޖިލިސް އިންތިހާބުގެ ކެމްޕޭނުގައި ރޭ ބޭއްވި ޖަލްސާއެއްގައި ވާހަކަފުޅުދައްކަވަމުން ރައީސް ވިދާޅުވީ އެ މަނިކުފާނު ބޭނުންވަނީ ބަދަލު ހިފުމުގެ ރޫހު ރާއްޖެއިން ނައްތާލުމަށް ކަމަށެވެ. އަދި ކުރީގެ ވެރިކަންތަކުން ސިޔާސީ ބޭނުމެއްގައި ރައީސުންނާއި މިނިސްޓަރުން ހައްޔަރުކޮށްފައިވީ ނަމަވެސް މި ސަރުކާރުން އެކަންކަން ނުކުރާނެ ކަމުގައިވެސް ރައީސް މުއިއްޒު ވިދާޅުވިއެވެ.
ތިބޭފުޅުން ރާއްޖޭގެ ރައްޔިތުން ބޮޑު އަޣުލަބިއްޔަތަކުން ކުރީގެ ދިޔަ މިސްރާބު ކަމު ނުގޮސްގެން ދިވެހިންގެ އަތް މައްޗަށް ރާއްޖޭގެ މިސްރާބު ގެނެސްފައި އޮތްވައި އެކަން ކުރަން ފަށައިފައި އޮތް ސަރުކާރެއް އަނެއްކާ ވެސް އެކި ކަހަލަ ހަމަނުޖެހުމުގެ ތެރެއިން ބަދަލުކުރުމާއި، އަޒުލުކުރުމާއި މިކަހަލަ ކަންކަން ކުރުމުގެ ވާހަކަ މިހާރު, އެ ބޭފުޅުންނަށް ކެތް ނުވެގެން އިންތިހާބު ގާތްވާން ފެށީމައި ފާޅުގައި ސާފުކޮށް މި ވިދާޅުވާން ވެސް ފެށީނުންތޯ. އޭގެ ކުރިން ވިދާޅުވީ ޖަވާބުދާރީކުރުވާ ވާހަކަ. ރަނގަޅު ޖަވާބުދާރީ ކުރުވަން ޖެހޭނެ، އެކަމަކު ޖަވާބުދާރީ އެ ލަފްޒު އެ ބޭފުޅުން މާނަކުރަނީ ސަރުކާރު ވައްޓާލުމަށް. ސަރުކާރު ބަދަލުކުރުމަށް.
ރައީސް ވިދާޅުވި އެވެ.
ރައީސް މުއިއްޒު ވިދާޅުވީ އިދިކޮޅު މުޅިންވެސް ދައްކަމުން ދަނީ، ރައްޔިތުން ބޮޑު އަޣުލަބިއްޔަތަކުން އިންތިހާބުކޮށްފައިވާ ސަރުކާރެއް ބަދަލުކުރުމާއި އަޒުލުކުރުމުގެ ވާހަކަތައް ކަމުގައެވެ.
