ސްރީލަންކާގެ ނަވަލޯކާ ހޮސްޕިޓަލުގެ އެންމެ ބޮޑު އޮޕަރޭޝަން ތިއޭޓަރުގެ ބޭރުގައި ދެކޮޅަށް ހިނގާލަ ހިނގާލާ ޒަމީރު ހުއްޓެވެ. ކަންބޮޑު ވުމާއި ހާސްވުމާއި އެކުގައެވެ. އޭނާގެ އުމުރުން ދުވަސްވީ މަންމަ ޝަފީޤާ ކައިރީގައި ހުރި ގޮނޑިއެއްގައި އިށީދެގެން އިނެވެ. އެމީހުން އިންތިޒާރުކޮށްކޮށް ތިބީ ތިއޭޓަރުން ޑޮކްޓަރުން ނުކުމެ ޚަބަރެއް ދޭނޭ ވަގުތަކަށެވެ.
އިރު އިރުކޮޅާ ޒަމީރު މޫނު ފޮހެލައެވެ. ބޮލުގައި އަތްކާއްތާލައެވެ. އޭނާގެ ހާސްވުމާއި ކަންބޮޑުވުން އޭނާގެ މޫނު މަތިން ކިތަންމެހާވެސް ރީތިކޮށް ދޭހަވެއެވެ. ހޮސްޕިޓަލުގެ ކޮރިޑޯތެރެއިން އެތައް ބަޔަކު ދެކޮޅަށް ހިނގިޔަސް އަދި ވާހަކަދައްކައި މަޖާކޮށް ހަދަމުން ދިޔަސް އެއިން އެއްވެސް ކަމެއް ޒަމީރަކަށް އިހުސާސެއް ނުވެއެވެ. އޭނާގެ ހިތުގެ ތެޅުންވަނީ އަވަސްވެފައެވެ. ނޭވާ ވަނީ ކުރުވެފައެވެ. ފެންކަޅިވެފައިވާ ދެލޮލުން އޭނާ އިރު އިރުކޮޅާ މަންމައަށްވެސް ބަލާލައެވެ. ދެންވާނީ ކިހިނެއްކަން ނޭނގޭތީއެވެ. ވާނީވެސް އެހެންނެވެ. އޮޕަރޭޝަން ތިއޭޓަރުގައި އެވަނީ އޭނާގެ ހިތުގެ އެއްބައެވެ. މޭގެ އެތިކޮޅެވެ. ލޮލުގެ ނޫރެވެ. ހިތުގެ ފިނިކަމެވެ. ކުރިއަށް އޮތީ އުފަލުގެ ވަގުތުކަމެއް ނުވަތަ ހިތާމައިގެ ވަގުތުކަމެއް ބުނެދޭން އެނގޭނީ ކާކަށް ހެއްޔެވެ؟ އެފަދަ މީހަކު ހުރިނަމަ އެހާސްވުމާއި ކަންބޮޑުވުމުގައި އެތާކު ޒަމީރެއް ނުހުރީހެވެ.
ހިތާހިތުން ޒަމީރު ދުޢާކުރަމުން ދިޔައީ ދަރިފުޅަށް ޓަކައެވެ. ދަރިފުޅު ހެޔޮހާލުގައި އޭނާއަށް ލިބުން އެދިގެންނެވެ. އޭނާގެ ހިތްވަނީ ޝަކުވާއިން ފުރިފައެވެ. ހިތާމައިގެ ގިލަންތަކުގައި އެތައް އަހަރެއް ވޭތުކޮށްފިއެވެ. އެދުވަސްތަކަށް ނިމުން އައީ ކަމެއް ނުވަތަ ހިތާމައިގެ ދުވަސް އަދި ކުރިޔަށް އޮތީކަމެއް އޭނާއަކަށް ނޭނގެއެވެ.
ޒަމީރުގެ މަންމަ ޝަފީޤާގެ ހާލަކީވެސް އެއީ އެވެ. ޒަމީރުގެ ނުކުޅެދޭ ދަރިފުޅު ޒަމީރަށް ދީފައި އޭނާގެ އަންހެނުން ދިޔައީ އެދަރިފުޅުގެ އުމުރުން އަހަރެއްވެސް ނުވަނީހެވެ. މުއްސަނދި ފުދުންތެރި އެހެން މީހަކާއި ހިތާވެގެންނެވެ. ޒަމީރަކީ ނިކަމެއްޗަކަށް ވިޔަތީއެވެ. އެހެން މީހުންނާއި ދޭތެރޭ އޯގާތެރިކޮށް ކަންތައް ކުރާ ނަފުރަތާއި ހަސަދައިގެ ކަންފުޅެއްވެސް ހިތުގައި ނެތް މީހަކަށްވާތީއެވެ. ފަހަރުގައި އޭނާއަށް އެހެން ހަދަން ކެރުނީ ޒަމީރުގެ މަޑުމައިތިރި މިޒާޖުގެ ސަބަބުން ކަމުގައިވެސް ވެދާނެއެވެ.
އެއީ ހިތްހަރު އަންހެނެކެވެ. މައިކުލުނުގެ ކަންފުޅެއްވެސް އޭނާގެ ކިބަޔަކު ނެތެވެ. އެހެން ނޫންނަމަ ދަރިއަކު، ޚާއްސަކޮށް ނުކުޅެދޭ ދަރިއަކު އެއްލާލާކަށް އޭނާއަކަށް ނުކެރުނީހެވެ. މިވީ ފަސްއަހަރު އެދަރިފުޅުގެ ކޮންމެ ކަމެއް ބެލެހެއްޓީ ޝަފީޤާގެ އެހީތެރިކަމާއި އެކު ޒަމީރެވެ. އެއީ ރަނގަޅަށް ވާހަކަ ނުދެއްކޭ ކުއްޖެކެވެ. ލޮލާއި ސިކުނޑީގައި އުފެދުމުގައި އުނިކަމެއް ހުރިކުއްޖެކެވެ. ހިތުގައި ލޯވަޅެއް ހުރުމުގެ ސަބަބުން ފުރާނައަށް ނުރައްކާވެފައިވާ ކުއްޖެކެވެ.
ދަރިފުޅަށްޓަކައި ޒަމީރު އެތައް ޤުރުބާނެއް ވެއްޖެއެވެ. ދަރިފުޅުގެ ބޭސްފަރުވާއަށްޓަކައި ބޭނުންވާ ފައިސާ ހޯދުމަށް އޭނާ މުއްސަނދިންގެ ފައިބުޑަށް ވެއްޓި ސަލާންޖެހިއެވެ. އެމީހުންނަށް އާދޭސް ކުރިއެވެ. އެކަމަކު އެކަންކަމުގެ ތެރޭންވެސް އޭނާއަށް އެތައް ކެއްސެއް ލިބުނެވެ. އެކުވެރިއެއްގެ ހީލަތްތެރިކަމުގައި ހަޔާތުގެ އުންމީދުތައް އޮޔާދިޔަވެސް މެއެވެ. އެކަމަކުވެސް އޭނާ ދުލެއް ނުކުރެއެވެ. ހިއްވަރު ކުރިއެވެ. ހަމައެކަނި ދަރިފުޅަށް ޓަކައެވެ.
އަންހެނުން ދަރިފުޅު އެއްލާލާފައި ދިޔުމުން ރަށުގައި އިން މުސްކުޅި މަންމަ ދަރިފުޅު ބަލަން މާލެގެންނަށް ޒަމީރަށް މަޖުބޫރުވީއެވެ. ބަނޑުއަޅައި ވިހޭ މައިމީހާ އެދަރިފުޅަށް ކުލުނެއް ނުބެހެއްޓިއިރު ހިލޭމީހެއްގެ އެފަދަ ކުލުނެއް ހުންނާނެކަން ޒަމިރަށް ޤަބޫލުނުކުރެވުނީ އެވެ. ދެވަނަ ކައިވެންޏެއް އޭނާ ނުކުރީ އެހެންވެގެންވެ.
ދަރިފުޅުގެ ބޭސްފަރުވާއަށް ބޭނުންވާ ފައިސާ ހޯދުމަށްޓަކައި އޭނާ އެތައް ޤުރުބާނެއް ވިއެވެ. ސިނގިރޭޓުބުއިމާއި ހޮޓާހޮޓަލުންކެއުން އާހެދުން ހޯދުން ހުއްޓާލިއެވެ. ބަނޑުހައި ހޫނުކަމުގައި އެތައް ދުވަހެއް ވޭތުކުރިއެވެ. މުސާރައިން ލިބޭ އާމުދަނީ ދަރިފުޅަށްޓަކައި ރައްކާކުރަމުން ދިޔައެވެ. އެވަރުން ނުފުދިގެން އޭނާ ފޯނާއި ސައިކަލުވެސް ވިއްކާލީއެވެ. ނުއަގުގައެވެ. އޭނާއަށް މަސައްކަތް ކުރެވޭނަމަ އެފަދަ ތަކެތި ލިބިދާނެއެވެ. އެކަމަކު ދަރިއަކު ނުލިބޭނެއެވެ. އެއީ އޭނާގެ ހިތުގެ އީމާނެވެ. ނަފުސްގެ ޔަޤީންކަމެވެ. މައިންބަފައިން ދަސްކޮށްދިން އުސޫލެވެ.
އެވަރުންވެސް ދަރިފުޅަށް ކުރަންޖެހޭ ޚަރަދުތައް ކުރުމަށް ބޭނުންވާ ވަރަށް އޭނާއަކަށް ފައިސާއެއް ނުލިބުނެވެ. އެހެން ކަމުން ވަޒީފާއިން ނިމިގެން އޭނާ ދާންފެށި އެމްޕީއެލް ސަރަހައްދަށް މަޖޫރީ ކުރާށެވެ. ހަށިގަނޑަށް ކިތަންމެ ބުރަނަމަވެސް ކިތައްމެ ވޭނެއް އެޅިނަމަވެސް ރެޔާއި ދުވާލު އޭނާގެ ދަރިފުޅު ރޯރުއިން ދެކެން އޭނާގެ ހިތަށް ކުޅަދާނަ ނުވާތީއެވެ.
ފަހީމާއި ދިމާވެ ރައްޓެހިކަން އުފެދުނީ އެދުވަސްވަރުއެވެ. އޭނާއަކީ ކިޔަވައިގެން ހުރި ހޭލުންތެރި މީހަކަށްވާތީ އޭނާ ހުށައެޅީ ފޭސްބުކާއި ޓްވިޓާގައި ޒަމީރުގެ ދަރިފުޅަށް ޗެރިޓީ ޕޭޖެއް ހުޅުވާށެވެ. އެގޮތުގައި އެތައް ފައިސާއެއް ލިބުނެވެ. އެފައިސާ ޖަމާވަމުން ދިޔައީ ފަހީމްގެ އެކައުންޓަށް ކަމުން ލިބެމުންދިޔައީ ކިހާފައިސާއެއްކަމެއް ޒަމީރަކަށް ނޭނގެއެވެ. އެނގެނީ ފަހީމްބުނާއެއްޗެކެވެ. އޭނާބުނީ މާބޮޑުއެއްޗެއް ނުލިބޭ ކަމަށެވެ. އެންމެ ފަހުން ދެމީހުންގެ މެދުގައި މައްސަލަޖެހި އަހަރެއްހާ ދުވަހުގެ ތެރޭގައި އެހީގެ ގޮތުގައި ލިބުނު ފައިސާއޭބުނެ ފަހީމްދިނީ ދިހަހާހެއްހާ ރުފިޔާއެވެ. އެކަމަކު އެ އެއްއަހަރުގެ ތެރޭގައި ފަހީމްގެ ދިރިއުޅުން އެތައް ތަނެއް ތަނަވަސްވެގެން ދިޔަތަން ޒަމީރަށް ފެނުނެވެ. އޭނާ ސައިކަލާއި ފޯނު އާކުރަމުން ދިޔައެވެ. މާލޭގައި ފިހާރައެއް ހުޅުވައި ވިޔަފާރިއެއް ފެށިއެވެ. އެއީ ފަހީމަށް ލިބޭ އާއްމުދަނީން ވާވަރުގެ ކަންކަން ނޫންކަން ޒަމީރަށްވެސް އެނގެއެވެ. އެދެމީހުންގެ ގުޅުންވެސް ކެނޑެއް ޖެހުނީ އެކަންކަމުގެ ސަބަބުންނެވެ. އިތުބާރު ގެއްލުމުންނެވެ.
އެދުވަސްވަރު ޒަމީރު ދިޔައީ މުއްސަނދި ފޯރުންތެރި މީހުންގެ ގޭގެއަށްވެސް ހިނގަމުންނެވެ. އެކަމަކު ޒުވާން ބަފަޔަކު އޭނާގެ ދަރިއަކަށްޓަކައި އެފަދައިން މަސައްކަތް ކުރާނެ ކަމަށް އެމީހުންނަށް ނުވިސްނުނީ ކަމަށްވެދާނެއެވެ. ފައްސަތޭކައެއްހާ ރުފިޔާ މީހަކު ދިނަސް ގިނައީ އެއްޗެއް ނުދިން މީހުންނެވެ. މާޔޫސްކަމާއި އާވާރާކަމުގައި ދަރިފުޅަށްޓަކައި ޤުރުބާންވަމުން ދިޔަ ބައްޕަ އެމީހުންނަށް ސިފަވަނީ ފަތްބޯ މީހެއްގެ ގޮތުގައެވެ.
އެހިތި ތަޖުރިބާތަކަށް ފަހު ޒަމީރަށް ދެންދިމާވީ އެއަށްވުރެ ބޮޑު އަނެއް ހާދިސާއާއެވެ. މާލޭގެ ކެރިފޯރުންތެރި މުއްސަންޖަކު ޒަމީރުގެ ދަރިފުޅުގެ ބޭސްފަރުވާއަށް ބޭނުންވާ ހުރިހާ ޚަރަދެއް ދިނުމަށް އެއްބަސްވިއެވެ. ޝަރުތަކާއި އެކުގައެވެ. އޭނާގެ ދެކިޑްނީ ފެއިލްވެ ޑަޔަލަސިސް ހަދަމުންދާ އޭނާގެ ދަރިއަކަށް ޒަމީރުގެ ކިޑްނީއެއް ދިނުމަށް ޝަރުތު ކުރުމަށްފަހުގައެވެ. އޭނާ އެއްބަސްވީ ޓެސްޓްތައް ހެދުމަށްފަހު ޒަމީރުގެ ކިޑްނީ އޭނާގެ ދަރިފުޅަށް ޓްރާންސްޕްލާންޓް ކުރެވޭނަމަ ފައިސާދިނުމަށެވެ. ފަސްލައްކަ ރުފިޔާއެވެ. ޒަމީރު އެގޮތަށް އެއްބަސްވިއެވެ. އޭނާ ހުރީ ކޮންމެ ގޮތެއްގައިވެސް ދަރިފުޅަށްޓަކައި ވާންޖެހުނު ކޮންމެ ޤުރުބާނެއް ވުމަށް ތައްޔާރުގައި ކަމަށްވާތީއެވެ. އެކަމަކު ފަރުދާގެ ފުރަގަހުގައި ޒަމީރަށްޓަކައި ރޭވެމުން އައީ ކެހިވެރި ރޭވުމެއް ކަމުގެ އިހްސާސްކޮއްލާކަށް އޭނާއަކަށް ނޭނގެއެވެ. އެހެނީ އެއަށްވުރެ ބޮޑަށް އޭނާހުރީ ފައިސާއަށް ބޭނުންވެފައެވެ. އޭނާގެ ކުރިމަތީގައި ރެޔާދުވާލު އެނބުރެމުންދަނީ ދަރިފުޅުގެ ހިތާމަވެރި ހާލުގެ މަންޒަރުތަކެވެ.
ޓެސްޓްތައް ހެދުމަށްފަހު ޒަމީރުގެ ކިޑްނީ އެވިޔަފާރިވެރިޔާގެ ދަރިފުޅަށް ބަދަލުކުރެވިދާނެކަމަށް ޑޮކްޓަރު ބުނި ދުވަހު ޒަމީރަށް އުފަލުން ރޮވުނެވެ. ދަރިފުޅަށްޓަކައި އޭނާ ވާ އެބޮޑު ޤުރުބާނީ ގެއްލެނިވެގެން ނުދާނެތީއެވެ. އެޚަބަރު ލިބުނުރޭ އޭނާ ދަރިފުޅުގެ ގާތުގައި އެތައް ވަގުތެއް ހޭދަކުރިއެވެ. އެމައުސޫމް ދަރިފުޅު ނިދާފައި އޮތް އިރުވެސް ކައިރީގައި އިނދެ އެތައް ވާހަކައެއް އެދަރިފުޅާއި ދެއްކިއެވެ. ޒަމީރު އޭނާގެ ދަރިފުޅާއި މުޚާތަބުކޮށް ބުނަމުން ދިޔައެވެ. "ލޯބިވާ ދަރިފުޅާއެވެ. މިހިތާމަވެރި ރޭވެސް ނިމި އުފާވެރި ފަތިހަކަށް އަލިވިލޭނެއެވެ. ކޮންމެ ހިތާމައަކާއި މުސީބާތެއްގެ ފަހަތުގައި ރަހުމަތާއި ނިޢުމަތް ވާނެއެވެ. އެއީ ދުނިޔޭގެ ތަބީއީ ސުންނަތެވެ. ބައްޕަގެ ދަރިފުޅަށްޓަކައި މިހަށިގަނޑާއި ފުރާނަވެސް ވަޤުފްކޮށްދެމެވެ. ބަދަލުގައި ހަމައެކައްޗެއްވެސް ދަރިފުޅުގެ ކިބައިން ނޭދެހާލުގައެވެ. އުފަލާއި ނިއުމަތުގައި ދަރިފުޅު ބޮޑުވުން ނޫނީ ބައްޕަގެ އެހެން އެދުމެއް ނެތެވެ."
އެކަމަކު ދެންކުރިމަތިވީ އެހެން މައްސަލައެކެވެ. ޓެސްޓްތައް ޕޮޒިޓިވުމުން ފައިސާދިނުމަށް ބުނި އެވިޔަފާރިވެރިޔާ އެކަމަށް އިންކާރުކުރީއެވެ. ކުރިއަށް ފައިސާ ދީފިނަމަ ކިޑްނީ ޓްރާންސްޕްލާންޓް ހެދުމުގެ ކުރިން ޒަމީރު ފިލާފާނެތީއެވެ. ނުވަތަ ދެކޮޅު ހަދާފާނެތީއެވެ. އެހެންކަމުން އޭނާ ޒަމީރަށް ދިނީ ފަންސަވީސް ހާސް ރުފިޔާއެވެ. ކިޑްނީ ޓްރާންސްޕްލާންޓް ހެދުމުގެ އޮޕަރޭޝަނަށްފަހު ބާކީބައި ދޭނެކަމަށް ބުނެއެވެ.
ޒަމީރަށްވެސް ވިސްނުނީ އެގޮތް އެންމެ ރަނގަޅު ވެދާނެ ކަމަށެވެ. އެހެނީ އެމީހުންނަށްވެސް ޒަމީރަކީ ބީރައްޓެހި މީހަކަށްވާތީ އިތުބާރުކުރަން ދަތިވެދާނެ ކަމަށެވެ. ވީމާ، ޒަމީރުވެސް އެކަމާއި އެއްބަސްވީއެވެ. އެވިޔަފާރިވެރިޔާ އެއްބަސްވުމެއްވެސް ހެދިއެވެ. ޒަމީރުގެ ކިޑްނީއަކީ ހަދިޔާއެއް ކަމަށެވެ. ވިޔަފާރިއެއް ނޫންކަމަށެވެ. އެގޮތަށް ޒަމީރުވެސް އެއްބަސްވީއެވެ. އެއީ ހަށިގަނޑުގެ ގުނަވަންތަކުގެ ވިޔަފާރިއަކީ ޤާނޫނީ ގޮތުން ކުރެވޭނެ ވިޔަފާރިއެއް ކަމުގައި ނުވާތީއެވެ.
ޒަމީރު ކިޑްނީ ބަދަލުކުރުމުގެ އޮޕަރޭޝަން ކޮށްފިއެވެ. މުސްކުޅި މަންމައަށް އޭނާ އެކަން ސިއްރުކުރިއެވެ. އެކަން އެގޮތަށް ކުރުމަށް މަންމަ ނުގަބޫލުވާނެތީއެވެ. އެކަމަކު އޭނާއަށް އެނޫން މަގެއް މިއަދު ފެންނަން ނެތީއެވެ. ކަންތައް ދިމާވީ ޒަމީރު އުންމީދު ކުރިގޮތަކަށް ނޫނެވެ. ކިޑްނީ ބަދަލުކުރުމުގެ އޮޕަރޭޝަން ނިމި ތިން މަހެއްހާ ދުވަސްފަހުން މާލެ އައިރުވެސް އެވިޔަފާރިވެރިޔާ ޒަމީރަކަށް ފައިސާއެއް ނުދިނެވެ. އޭރު އޭނާ ބުނަމުން އައީ ފައިސާދެވޭނީ މާލެގޮސްކަމަށެވެ.
މާލެއައިސްވެސް އެތައް ފަހަރަކު ފަހަރަކު ޒަމީރު އެވިޔަފާރިވެރިޔާގެ އޮފީހަށް ދިޔައެވެ. ގެއަށް ދިޔައެވެ. އެކަމަކު ދިމައެއް ނުވިއެވެ. ފޯނަކުން ޖަވާބެއް ނުދިނެވެ. ޒަމީރު މުޅިން މާޔޫސްވިއެވެ. އިންސާފު ހޯދަން އޭނާއަށް ދެވޭނެ ތަނެއް ނެތެވެ. އެއްބަސްވުމުގައި ފައިސާދޭ ވާހަކައެއް ނެތެވެ. އެހެންކަމުން ޝަރުއީކޯޓަކަށް މައްސަލަވެއްދިޔަސް ވަގުތާއި އިތުރު ފައިސާ ބޭކާރުވުން ނޫންކަމެއް ނޯންނާނެކަން ޒަމީރަށް ޔަޤީނެވެ. އެހެންކަމުން ޒަމީރު އޭނާގެ ފަހަތުން ހިނގުން ހުއްޓާލީއެވެ. އުންމީދުގެ ހުޅުކޮޅު ކަނިވެ ނިވެމުންދާތީއެވެ.
ކިޑްނީ ބަދަލުކުރުމުގެ އޮޕަރޭޝަނުގައި ތިންމަހެއްހާދުވަހު އިންޑިޔާގައި މަޑުކުރަންޖެހުމުގެ ސަބަބުން ޒަމީރަށް ޖެހުނީ ވަޒީފާއިންވެސް ވަކިވާށެވެ. އެދުވަސްތަކުގައި ގޭގެކުއްޔާއި ދަރިފުޅުގެ ބޭސްފަރުވާއަށް ޚަރަދުކުރަން މަންމައަތަށް ދޭންޖެހުނީ އެތައް ބުރަ މަސައްކަތަކުން އޭނާ އެއްކުރި ފައިސާކަމުން މާލެ އާދެވުނު އިރު ބާކީ ހުރީވެސް ވިއްސަކަށް ހާސް ރުފިޔާއެވެ.
އެތައް އަހަރެއްވާންދެން ޒަމީރުކުރި މަސައްކަތް ބޭކާރުވެ ފެނަންވީއެވެ. އުންމީދުގެ ހުޅުކޮޅު ކަނިވީއެވެ. ދަރިފުޅު ހެދިބޮޑުވަމުން އައިވަރަކަށް ދަރިފުޅުގެ ފުރާނައަށް އައީ ނުރައްކާވަމުންނެވެ. އެހެން ކަމުން އެހުރިހާކަމެއްވީ ޒަމީރަށް ކެތްކުރަންދަތި ހިތާމައަކަށެވެ. ގިލަނަކަށެވެ. އެކަމަކުވެސް ޒަމީރު ކެތްކުރިއެވެ. ދިރިއުޅުމުގައި މިނޫންދުވަހެއް ފެންނާނެކަން ޔަޤީންކޮށްގެނެވެ.
އަނެއްކާވެސް އޭނާ އާހިއްވަރަކާއި އެކު މަސައްކަތްފެށިއެވެ. މުއްސަނދިންގެ ގޭގެއަށް ހިނގަންފެށިއެވެ. ވަޒިފާއެއް ލިބޭތޯ މީހުންގާތުގައި އާދޭސްކުރަންފެށިއެވެ. ރެޔާއި ދުވާ އޭނާގުނަމުން ދިޔައީ އެގޮތުގައެވެ. އެހެން ގޮތެއް ފެންނަން ނެތުމުން ދެން އަނެއްކާވެސް އޭނާއަށް ޖެހުނީ ވިޔަފާރި ބަނދަރުގައި މަޖޫރީއެއްގެ ގޮތުގައި މަސައްކަތްކުރާށެވެ. ޑޮކްޓަރުން ބުރަ މަސައްކަތްކުރުން މަނާކޮށްފައި އޮތަސް އޭނާއަށް އެނޫން ގޮތެއް ނެތީއެވެ.
ދުވާލުގެ ވަގުތުގައި ވިޔަފާރި ބަނދަރުގައި މަސައްކަތް ކުރުމަށްފަހު ދެން އޭނާ ނުކުންނަން ފެށީ ހާބަރާއި ކާނިވާ ސަރަހައްދަށް ސައިކަލާއި ވެހިކަލު ފޮހެދޭށެވެ. ދިވެއްސަކަށްވާތީ އޭނާއަށް ސައިކަލާއި ވެހިކަލް ފޮހެން ދޭ މީހުން ގިނަވަމުން އައެވެ. އޭނާ އަގެއް ނުކިޔައެވެ. މީހަކު ދިންއެއްޗެއްގައި ހިފަނީއެވެ.
މަހެއްހާ ދުވަސްވީއިރު އުންމީދުގެ ހުޅުކޮޅު އަލުން ދިއްލެން ފަށައިފިއެވެ. ލިބޭ އާމުދަނީ އިތުރުވާން ފަށައިފިއެވެ. ޒަމީރާއި އޭނާގެ ދަރިފުޅުގެ އަތުގައި ނަސީބު ހިފީ ކާނިވާ ސަރަހައްދުގައި އޭނާ ސައިކަލު ފޮހެން އުޅުމުގެ ތެރޭގައި ދިމާވި އޯގާތެރި ތެދުވެރި ނޫސްވެރިއެއްގެ ސަބަބުންނެވެ.
އޭނާ ޒަމީރުގެ ހާލުގެ ވާހަކަ މީޑިޔާއަށް ފެންމަތި ކުރިއެވެ. ޒަމީރުގެ ގިލަންވެރި ހަޔާތުގެ ސަފުހާތަށް އެންމެންނަށް ހުޅުވާލިއެވެ. ބައްޕަޔަކު އޭނާގެ ދަރިފުޅަށްޓަކައި ވަމުންދާ ބޮޑު ޤުރުބާނީ ދުނިޔެއަށް ހާމަކުރިއެވެ. އެއާއި އެކު ފައިސާއާއި އެހީތެރިކަން އޭނާއަށް އޮހިގަތީ އެކި ދިމަދިމާލުންނެވެ. ކާކުކަން ހާމަކުރަން ބޭނުން ނުވާ އެތައް ބަޔަކު ކުދި އަދަދު ތަކުންނާއި ބޮޑެތި އަދަދު ތަކުން ޒަމީރުގެ އެކައުންޓަށް ފައިސާ ޖަމާކޮށްދިނެވެ. އޭރު ދަރިފުޅަށްޓަކައި ރެޔާއި ދުވާލު ޒަމީރު މަސައްކަތް ކުރަމުން އަންނަތާ ފަސްއަހަރުވެއްޖެއެވެ.
ދެލައްކައެއްހާ ރުފިޔާ އަތުގައި ޖަމާވުމުން ބޭސްފަރުވާއަށް ބޭރަށް ފުރުމުގެ ކަންކަމާއި ތީމުގެއިން ސަރުކާރުގެ އެހީވެސް ހޯދައިދިނީ އެނޫސްވެރިޔާއެވެ. އޭނާއަށް ޒަމީރުގެ ހިތްވަނީ ޝުކުރުން ފުރިފައެވެ. މިދުނިޔޭގެ ބިމުން އޯގާތެރިކަމާއި ތެދުވެރިކަމާއި ހަމްދަރުދީގެ ވޮށް ނުނިވޭކަން އޭނާއަށް ޔަޤީންވީ އެނޫސްވެރިޔާއާއި ދިމާވުމުންނެވެ.
މިއަދު ނަވަލޯކާ ހޮސްޕިޓަލުގެ އޮޕަރޭޝަންތިއޭޓަރުގައި ކުރެވެމުން އެދަނީ ޒަމީރުގެ ދެލޯފަދަ ދަރިފުޅުގެ ހިތުގެ އޮޕަރޭޝަނެވެ. އެދަރިފުޅުގެ ހާލު މީޑިޔާއިން ކި އެތައްބައެއްގެ ހެޔޮދުއާއާއި ބައްޕައެއްގެ ނިހާއީ އިލްތިޖާތަކުން ދަރިފުޅުގެ ހަޔާތް އަމާންކަމުގެ އައްސޭރިއަކަށް ވާޞިލްވާނެކަން ޒަމީރު ޔަޤިން ކުރިއެވެ.
ތިއޭޓަރުގެ ދޮރު ހުޅުވުމާއި އެކު ޒަމީރުގެ ހިތްތެޅިގަތެވެ. ހެވިފައި ހުރި ޑޮކްޓަރާއި އޭނާގެ ތަރުޖަމާނު ޒަމީރަށާއި މަންމައަށް ދިނީ އުފާވެރިހަބަރެކެވެ. އޮޕަރޭޝަންކާމިޔާބުވި ޚަބަރެވެ. ޒަމީރު ﷲއަށް ހަމްދު ކުރިއެވެ. މަންމަގެ ގައިގައި ބައްދައިގެންފައި އުފަލުން ރޮއެގަތެވެ. އޭނާގެ އެންމެ ބޮޑު ކަންބޮޑުވުން ފިލީއެވެ. ހިތާމައިގެ ރޭތަކަށް ނިމުން އައީ އެވެ.
އޭނާގެ ދަރިފުޅުގެ ލޮލުގެ ފެނުންކޮށްޓަސް ވާހަކަ ދެއްކުން އުނދަގުލަސް އޭނާ އެދަރިފުޅާއިއެކު އުފާވެރި ދިރިއުޅުމެއް ވޭތު ކުރާނެއެވެ. ދަރިފުޅު ބުނާ ކޮންމެ ލަފްޒެއްގައި އަޑުތައް ބުރި ބުރިވެ ދޭހަކުރަން އުނދަގޫ ވިޔަސް ޝައުޤުވެރިކަމާއި އެކު އަޑު އަހާނެއެވެ. ޕާކާއި ގޮނޑުދޮށަށް ގޮސް މިރީތި ދުނިޔޭގެ މަންޒަރުތައް ހުންނަގޮތް އެދަރިފުޅަށް ކިޔައިދޭނެއެވެ. އެދަރިފުޅުގެ އިނގިލީކުރީގައި ހިފައިގެން ނުކުމެ މިދުނިޔޭގައި އުޅޭނެގޮތް ދަސްކޮށްދޭނެއެވެ. އޭނާގެ ހިތުގެ އީމާނާ އަޤީދާ ވަރުގަދައެވެ. އޭނާ ނެތް ދުނިޔެއެއް އަޔަސް އޭނާގެ ދަރިފުޅާއި އެކު އޭނާގެ ހެޔޮދުޢާވާނެއެވެ. ޔަތީމުންގެ ބަލަދުވެރި ފަރާތުން އެދަރިފުޅުގެ ހާލަށް ބައްލަވައި ވޮޑިގެންވާނެއެވެ. ޒަމީރު އޭނާގެ މައްޗަށް އޮތް ހައްޤު އަދާކޮށްފިއެވެ. އަދި އެހައްޤު އަދާކުރުމުގައި ފުރާނަ ހުރިހާ ދުވަކު އޭނާ ދެމި ހުންނާނެއެވެ.
– ނިމުނީ –
