މާލޭގެ ޓޭކްއަވޭއަކަށް ގެއްލުންދީ މާރާމާރީ ހިންގި މައްސަލައިގައި ހައްޔަރު ކުރި މީހާގެ ބަންދަށް 10 ދުވަސް ޖަހައިފިއެވެ.
މި މައްސަލައިގައި ހައްޔަރު ކުރީ މާލެ އަށް އުފަން އުމުރުން 45 އަހަރުގެ ދިވެހި ފިރިހެނެކެވެ.
މި މާރާމާރީއަކީ ރޯޝަނީ މަގުގައި ހުންނަ "ފޫޑް ޓެކްއަވޭ އައުޓްލެޓް" އަކަށް ގެއްލުންދޭން އުޅުމުން ހިންގި މާރާމާރީއެއް ކަމަށް ފުލުހުން ބުނެއެވެ. ކޯޓު އަމުރުގައިވާ ގޮތުން އެމީހާ މާރާމާރީ ހިންގި ކަމާއި ހޮޅިދަނޑިއެއް ހިފައިގެން ހުރި ކަމަށް ވަނީ އިއުތިރާފްވެފައެވެ.
އެމީހާ ބަންދުކޮށްފައި ވަނީ އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް އޮތް ކަމަށް ފެންނާތީއެވެ.
މި މާރާމާރީގެ ވީޑިއޯ މީސް މީޑިއާގައި ދައުރު ވަމުންދާއިރު، ވީޑިއޯ އިން ފެންނަނީ މީހުންތަކެއްގެ މެދުގައި މާރާމާރީ ހިންގާ މަންޒަރެވެ. އަދި މާރާމާރީއަށް ފަހު އެއްބައި މީހުން ސައިކަލަށް އަރައިގެންދާ މަންޒަރުވެސް ވީޑިއޯ އިން ފެނެއެވެ.
