ފުލުހުންގެ ހިދުމަތަކީ ރައްޔިތުންގެ މެދުގައި އެއްވެސް ތަފާތުކުރުމެއްނެތި 24 ގަޑިއިރު މެދުކެނޑުމެއްނެތި ދެމުންގެންދާނެ ހިދުމަތެއްކަން ރައްޔިތުންނަށް ކަށަވަރުކޮށް ދެއްވާނެ ކަމުގައި ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒު، ފުލުހުންނާ ބައްދަލު ކުރެއްވުމަށް އިސްކަންދަރު ކޮށީގައި ބޭއްވި ޖަލްސާގައި ޝުޖާއު ވިދާޅުވީ ކޮންމެ މުއައްސަސާއެއްގެ ކުރިއެރުން ރައްޔިތުން ވަޒަންކުރާނީ އެ މުއައްސަސާއަކުން ފޯރުކޮށްދޭ ހިދުމަތުގެ ފެންވަރުންކަމާއި ދިވެހި ފުލުހުންގެ ހިދުމަތް ދެވިގެންދާނީ އުސޫލުތަކެއްގެ މައްޗަށް ރޭވިގެން އެކުލަވާލެވޭ ސްޓްރެޓެޖިކް ޕްލޭންތަކެއްގެ މައްޗަށް ބިނާވެގެން ކަމަށެވެ.
އެގޮތުން ފުލުހުންގެ 91 ވަނަ އަހަރީ ދުވަހު އިފްތިތާހު ކުރެވިދެންދާ ސްޓްރެޓެޖިކް ޕްލޭންގެ ދަށުން ގައުމަށް ނުރައްކާވާ މިންވަރަށް ބޮޑުވެފައި ހުރި މައްސަލަތަކަށް އެ ޕްލޭންގެ ދަށުން އެކަށޭނެ ހައްލުތަކެއް އަންނާނެކަމަށް ފާހަގަކުރެއްވިއެވެ.
ރޭގެ ރަސްމިއްޔާތުގައި ސްޓްރެޓެޖިކް ޕޮލިސިންގ ރިއުކަޔަރމަންޓް އިފްތިތާޙްކޮށްދެއްވީ ރައީސް ޑރ. މުއިއްޒުއެވެ. އަދި ސްޓްރެޓެޖިކް ޕޮލިސިންގ ރިއުކަޔަރމަންޓް ދިވެހި ފުލުހުންގެ ހިދުމަތާ ހަވާލުކޮށްދެއްވީ މިނިސްޓަރު އިހުސާނުއެވެ. ދިވެހި ފުލުހުންގެ ހިދުމަތުން ސްޓްރެޖިކް ޕޮލިސިންގ ރިކުއަރމަންޓާ ހަވާލުވެލެއްވީ ކޮމިޝަނަރ އޮފް ޕޮލިސް އަލީ ޝުޖާޢުއެވެ.
ސްޓްރެޓެޖިކް ޕޮލިސިންގ ރިއުކަޔަރމަންޓަކީ ދިވެހި ފުލުހުންގެ ހިދުމަތުގެ ގާނޫނުގެ 69 ވަނަ މާއްދާގައި ވާގޮތުގެ މަތިން ވަޒީރަށް މަތިކުރެވިފައިވާ މަސްއޫލިއްޔަތުތަކާއި ބާރުތަކުގެ ދަށުން ރައީސުލް ޖުމްހޫރިއްޔާގެ ސިޔާސަތުތަކާ އެއްގޮތަށް ދިވެހި ފުލުހުންގެ ހިދުމަތް ވަޒީރުގެ ބެލުމުގެ ދަށުން ހިންގާނެ ގޮތާ ޖަވާބުދާރީ ކުރުވާނެ ގޮތް ބަޔާންކޮށްދިނުމުގެ ގޮތުން ވަޒީރު ލިޔުމުން ކަނޑައަޅައި ފުލުހުންނަށް އަންގާ ރަސްމީ ލިޔުމެކެވެ.
ސްޓްރެޓެޖިކް ޕޮލިސިންގ ރިއުކަޔަރމަންޓްގައި ގައުމުގެ ހާލަތަށްބަލައި ފަރުދުންނާ މުޖުތަމައު، ނުރައްކާތެރި ކުށާއި އިންތިޒާމްވެގެން ހިންގާ ބޮޑެތި ޖިނާއީ ކުށާއި ފަރުދުންގެ ހައްގުތަކަށް ނުރައްކަލެއް ކުރިމަތިވެދާނެ ކަންކަމުން އެމީހުން ސަލާމަތްކުރުމަށާއި ދިވެހި ފުލުހުންގެ ހިދުމަތުގެ ގާނޫނުގެ ދެވަނަ މާއްދާގައި ބަޔާންކޮށްފައިވާ ފުލުހުންގެ މަގްސަދުތައް ހާސިލްކުރުމަށްޓަކައި ފުލުހުންގެ ކިބައިގައި ގާބިލްކަން އުފައްދައި ފުލުހުން ތައްޔާރުވެތިބެންޖެހޭ އަމާޒުތައް ތަފްސީލްކޮށް ބަޔާންކޮށްފައިވެއެވެ.
