ބޮލީވުޑްގެ ސުޕަސްޓާރު އަމީތާބް ބައްޗަން ހޮސްޕިޓަލްގައި އެޑްމިޓްކޮށް ފަރުވާ ދެމުން އެބަދެ އެވެ.
މީޑިއާތަކުން ބުނީ އިއްޔެގެ ވަރަށް ހެނދުނުގެ ވަގުތެއްގައި 81 އަހަރުގެ އެކްޓަރު އެޑްމިޓްކުރީ މުމްބާއީގެ ކޮކީލާބެން ހޮސްޕިޓަލްގައި ކަމަށެވެ. އަދި އެތަނުގައި އެންޖިއޮޕްލާސްޓީ ސާޖަރީއެއް ވެސް ހަދާފައިވާ ކަމަށް ބައެއް މީޑިއާތަކުން ބުންޏެވެ.
ބައެއް ރިޕޯޓްތައް ކުރިން ބުނި ގޮތުގައި، އޭނާ ކުރީ ހިތުގެ އޮޕަރޭޝަނެކެވެ. ފަހުން ހަބަރުތަކުގައި ބުނީ އޭނާ އޮޕަރޭޝަން ކުރީ ފައިގެ ލޭހޮޅިއެއް ބެދިގެން ކަމަށެވެ. އޭނާގެ ހާލު މިހާރު ރަނގަޅު ކަމަށް ރިޕޯޓްތައް ބުންޏެވެ.
މީގެ ކުރިން ވެސް އެކި ފަހަރު މަތިން ސިއްހީ އެކި ކަހަލަ މައްސަލަތައް ދިމާވެގެން އަމީތާބް އެޑްމިޓްކޮށް ފަރުވާ ދީފައިވެ އެވެ. އެކަމަކު އަމީތާބް ފާހަގަކުރެވެނީ ވަރަށް ފިޓް، އުމުރާ އަޅާބަލާ އިރު ސިއްހީ މާ ބޮޑެތި މައްސަލަތަކެއް ނެތް މީހެއްގަ އެވެ.
