ފުލުހުންނަށް އިންޒާރުދިން ހަތަރު މީހަކު ހައްޔަރު ކޮށްފި

ހުޅުމާލޭ ދެވަނަ ފިޔަވަހު H-11ގައި ފުލުހުންނަށް އިންޒާރުދިން 4 މީހަކު ހައްޔަރު ކޮށްފިއެވެ.

ފުލުހުން ބުނެފައިވަނީ ހައްޔަރު ކޮށްފައިވަނީ ހުޅުމާލޭގެ ދެވަނަ ފިޔަވަހީގެ H-11 ސަރަހައްދު ކައިރިން، އާންމު ރައްޔިތުންގެ މެދުގައި ބިރުވެރިކަން އުފެދޭ ގޮތަށް ބާރު ސްޕީޑުގައި ދުއްވި ސައިކަލެއް، ފުލުހުން އެ ސައިކަލު ހުއްޓުވައި، އޭގައި އިން މީހާ ފުލުހުންގެ ބެލުމުގެ ދަށަށް ގެންނަން މަސައްކަތް ކުރުމުން ފުލުހުންގެ ދައުރު އަދާކުރުމަށް ހުރަސްއެޅި މީހެއް ކަމުގައެވެ.

އަދި އެ ސަރަހައްދުގައި އާންމު މަސްލަހަތު ގެއްލޭގޮތަށް، އަދި އެ ސަރަހައްދުގައި ހަރަކާތްތެރިވި ފުލުހުންނާއި ފުލުހުންގެ އާއިލާއަށް ނިސްބަތްކޮށް އެމީހާ އިންޒާރުދީފައިވާ ކަމަށްވެސް ފުލުހުން ބުނެފައި ވެއެވެ.

ފުލުހުން ބުނެފައިވަނީ މި މައްސަލައާއި ގުޅިގެން އެކި ދުވަސްމަތިން ކޯޓު އަމުރުގެ ދަށުން ހަތަރު މީހަކު ހައްޔަރު ކޮށްފައިވާ ކަމުގައެވެ. އެމީހުންނަކީ 21 އަހަރުގެ ދެމީހުންނާއި 24 އަހަރުގެ މީހެއްގެ އިތުރުން 26 އަހަރުގެ މީހެއްކަން ފުލުހުން ހާމަކޮށްފައިވެއެވެ.

މި ހަތަރު މީހުންގެ ތެރެއިން، ހައްޔަރު ކޮށްފައިވާ 26 އަހަރުގެ މީހާ ހައްޔަރު ކޮށްފައިވަނީ ލ. ގަމުންނެވެ. އޭނާގެ ބަންދާމެދު ގޮތެއް ނިންމުމަށް ގަން މެޖިސްޓްރޭޓް ކޯޓަށް ހާޒިރުކުރުމުން، އޭނާ ކަފާލާތުގެ ދަށުން އެހެން މީހަކު ޖާމިނުކުރުމުން، 30 ދުވަހު މުއްދަތަކަށް ގެއިން އެއްގޮތަކަށް ވެސް ނުނިކުންނަ ގޮތަކަށް ޝަރުތުކޮށް ދޫކޮށްލާފައިވާ ކަމަށް ފުލުހުން ބުނެފައި ވެއެވެ.

މި މައްސަލައިގައި 21 އަހަރުގެ ދެމީހުންނާއި 24 އަހަރުގެ މީހާ ހައްޔަރުކޮށްފައިވަނީ މިއަދުގެ ވަގުތެއްގައެވެ. މި ތިން މީހުންގެ ބަންދާމެެދު ގޮތެއް ނިންމުމަށް ހުޅުމާލޭ މެޖިސްޓްރޭޓް ކޯޓަށް ހާޒިރު ކުރުމުން 21 އަހަރުގެ މީހާ ދެދުވަހަށް، އަދި 21 އަހަރުގެ އަނެއް މީހާއާއި 24 އަހަރުގެ މީހާ 10 ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.