ކުރީ ސަރުކާރުން ކުރިޔަށް ގެންދިޔަ "ބިންވެރިޔާ" ސްކީމުގެދަށުން ދޫކޮށްފައިވާ ގޯތިތަކުގެ ތެރެއިން 8،250 މީހުން މިހާތަނަށް އެއްބަސްވުމުގައި ސޮއި ކޮށްފައިވާކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން ބުނެފިއެވެ.
މި ސްކީމުގެ ދަށުން ދޫކުރުމަށް ހަމަޖެހިފައިވާ ގޯތިތަށް ދޫކުރުމަށް ހަމަޖެހިފައިވަނީ ހުޅުމާލޭ 2 ވަނަ ފޭސްއާއި، ތިންވަނަ ފޭސްގެ ގޮތުގައި ހިއްކާ ބިމާއި އަދި ހިއްކަމުންދާ ގިރާވަރު ފަޅުންނެވެ.
ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން މިއަދު ބުނެފައިވަނީ، މިހާތަނަށް 8،250 މީހުން ސޮއިކޮށްފައިވާއިރު، އިތުރު 118 ފަރާތަކާ ބިން ލިބިފައިވާކަމުގެ ލިޔުން ހަވާލުކޮށްފައިވާ ކަމުގައެވެ. އަދި އިތުރަށް 303 ފަރާތަކާއި ބިން ލިބިފައިވާކަމުގެ ލިޔުން ހަވާލުރަން ޖެހިފައިވާކަމަށްވެސް ބުނެގައި ވެއެވެ.
އެޕްލިކަންޓް/ އެޕްލިކަންޓުން ބިން ދޫކޮށްލަން އެދިފައިވާތީ ސޮއި ނުކުރެވި ހުރި ފަރާތްތަކުގެ އަދަދު 16 އަށް އަރާއިިރު، އެޕްލިކަންޓް/ އެޕްލިކަންޓުން ނިޔާވުމުގެ ސަބަބުން ސޮއި ނުކުރެވި ހުރި ފަރާތްތަކުގެ އަދަދު 12 އަށް އަރާކަމަށްވެސް މިނިސްޓްރީން ވިދާޅުވެފައި ވެއެވެ.
މިނިސްޓްރީން ވިދާޅުވެފައިވަނީ އެއްބަސްވުމުގައި ސޮއިކުރުމާއި، ރަޖިސްޓްރީ ހަވާލުކުރުމާއި އަދި ގޯތި ލިބުނުކަމުގެ ލިޔުން ހަވާލުކުރުމަށް މިނިސްޓްރީން އެ ފަރާތްތަކާ ގުޅަމުންދާ ކަމުގައެވެ. އަދި މިކަމާއި ގުޅޭގޮތުން މިނިސްޓްރިއާއި ގުޅަން ބޭނުންވާނަމަ ހޮޓްލައިން 4004994 އަދި 4004797 އާއި ގުޅުމަށްވެސް މިނިސްޓްރިން އެދިފައިވެއެވެ.
