މޯލްޑިވްސް އިސްލާމިކް ބޭންކް (އެމްއައިބީ) ގައި މީހަކު ހުޅުވާފައިވާ އެކައުންޓަކުން މަކަރާއި ހީލަތުން 1.8 މިލިއަން ރުފިޔާ ނެގި މައްސަލާގައި 3 މީހަކު ހައްޔަރު ކޮށްފައިވާކަމަށް ފުލުހުން ވިދާޅުވެއްޖެއެވެ.
އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުންގެ އިކޮނޮމިކް ޑިޕާޓްމަންޓްގެ ހެޑް، ސުޕްރިޓެންޑެންޓް އޮފް ޕޮލިސް އަބްދުﷲ ރަޝީދު ވިދާޅުވީ ފެބްރުއަރީ 13 ވަނަ ދުވަހު ހުށަހެޅި މައްސަލައިގައި ވަގުތުން ބޭންކްތަކާއެކު މަސައްކަތްކޮށް 48 ގަޑިއިރުގެ ތެރޭގައި ގެއްލުނު ފައިސާގެ ބޮޑު ބައެއް ހޯދާފައިވާ ކަމަށެވެ.
އެ މައްސަލައިގައި ހިމެނެނީ ތިން މީހުންނާއި ކުޑަކުއްޖެކެވެ. ފުލުހުން ހައްޔަރުކޮށްފައި ވަނީ 24 އަހަރުގެ އަންހެނަކާއި ފިރިހެނެއް އަދި 23 އަހަރުގެ ފިރިހެނެކެވެ. މި މައްސަލައިގައި ހިމެނޭ ކުޑަ ކުއްޖާގެ އުމުރަކީ 16 އަހަރެވެ.
ފޭރިގަތް ފައިސާ ބޭނުންކޮށްގެން އެ މީހުން ގަނެފައި ވަނީ މޯބައިލް ފޯނާއި އިލެކްޓްރޯނިކްސް އަދި ގަޑި އަދި ދޫނިފަދަ ތަކެއްޗެވެ. ތުހުމަތު ކުރެވޭ މީހުން ދިރިއުޅުނު ތަންތަން ބަލައި ފާސްކުރުމަށް ފަހު، ވަގަށް ނެގި ފައިސާ އިން ގަތް ކަމަށް ބެލެވޭ ގިނަ އަދަދެއްގެ ތަކެތި ފުލުހުން މިހާރު ހޯދާފައިވާ ކަމަށް އޭނާ ވިދާޅުވިއެވެ.
ރަޝީދު ވިދާޅުވީ މިދިޔަ އަންގާރަ ދުވަހުގެ ހަވީރު ފެންމަތިވި އެ މައްސަލައިގައި ފައިސާ ހޯދާފައިވަނީ ފޯނާއި ބީއެމްއެލް އެޕްގެ ޕާސްވޯޑު އެނގޭ މީހެއް މެދުވެރިވެގެން ކަމަށެވެ. ފުލުހުން ބުނީ ނުވަ ދުވަސް ތެރޭގައި ފޭރުނު ފައިސާ ބޭނުންކޮށްފައިވަނީ މޮބައިލް ފޯނު، އިލެކްޓްރޯނިކްސް ސާމާނު، ދޫނި އަދި އަތުކުރި ގަޑި ފަދަ ތަކެތި ގަތުމަށް ކަމަށެވެ.
މި މައްސަލައިގައި ތުހުމަތު ކުރެވުނު މީހުންގެ ބޭންކް އެކައުންޓްތަކުން މިހާތަނަށް ވަނީ ގާތްގަނޑަކަށް 1.3 މިލިއަން ރުފިޔާ ހޯދައިފައެވެ. އަދި ތުހުމަތު ކުރެވުނު މީހުން ދިރިއުޅުނު ތަންތަން ބަލާ ފާސްކޮށް، ނަގުތު ފައިސާގެ ގޮތުގައި 151،985 ރުފިޔާ ހޯދި އިރު، ތުހުމަތު ކުރެވުނު މީހުން ގަނެފައިވާ ތަކެތީގެ ތެރެއިން ވަނީ 223،780 ރުފިޔާގެ ތަކެތި ހޯދާފައިވެއެވެ. އެހެންކަމުން ގެއްލުނު 1.8 މިލިއަން ރުފިޔާގެ ތެރޭން މިހާތަނަށް ރިކަވާ ކުރެވިފައި ވަނީ 1.67 މިލިއަން ރުފިޔާ ކަމަށް ފުލުހުން ބުންޏެވެ.
ކޮމެންޓު ފޮނުވާ