ފްލެޓެއްގެ ދޮގު ވައުދާއެކު ފަސް ލައްކަ ރުފިޔާއިން މީހަކަށް ހިޔާނާތްތެރިވި ހިޔާނާތުގެ މައްސަލައާ ގުޅިގެން މީހަކު ހައްޔަރުކޮށްފި އެވެ.
މިގޮތުން ހައްޔަރު ކޮށްފައިވާ މީހަކީ ފޯނު ކޯލެއް މެދުވެރިކޮށް ފްލެޓެއް ދޭނެ ކަމަށް ވައުދުވެ، ބޭންކުގެ މުއާމަލާތަށް ވަން ޓައިމް ޕާސްވޯޑް (އޯޓީޕީ) ހޯދުމަށްފަހު، މީހެއްގެ އަތުން ފަސް ލައްކަ ރުފިޔާ ނެގި މީހެއްކަމަށް ފުލުހުން ބުނެފައި ވެއެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކޮށްފައިވަނީ 23 އަހަރުގެ ފިރިހެނެއް ކަމަށެވެ. މި މައްސަލައިގެ ތަހުގީގު ކުރިއަށްދާއިރު އޭނާގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހާފައެވެ.
މި މައްސަލައިގެ ތަހުގީގު ކުރިއަށްދާތީ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.
ހިޔާނާތުގެ މައްސަލަތައް ދާދި ފަހުން ވަނީ އިތުރުވެފަ އެވެ. މި ހާދިސާ ހިނގުމުގެ ކުޑަ ދުވަސްކޮޅެއް ކުރިން ގދ.އަތޮޅުގެ އަންހެނަކު ވެސް އެފަދަ ޚިޔާނާތެއްގެ ޝިކާރައަކަށްވެ، ފްލެޓް ލިބުނު ކަމަށް ބުނެ ދޮގު ވާހަކަދައްކައިގެން ދެ ލައްކަ އޭނާއަށް ރުފިޔާ ގެއްލުނެވެ.
އަދި އެ މައްސަލަ ވެސް މިހާރު ދަނީ ތަހުގީގު ކުރަމުންނެވެ.
ކޮމެންޓު ފޮނުވާ