ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވިލިމާލެ ދާއިރާއަށް ވާދަކުރައްވާނެ ކަން ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒް އިއުލާން ކުރައްވައިފިއެވެ.
ޝިފާޒް "އެކްސް" ގައި ކުރެއްވި ޕޯސްޓެއްގައި ވިދާޅުވީ އަންނަ މާޗް 17 ވަނަ ދުވަހު ބޭއްވުމަށް ނިންމާފައިވާ މަޖިލިސް އިންތިހާބުގައި ދަ ޑިމޮކްރެޓްސްގެ ޕާޓީގެ ޓިކެޓުގައި ނުކުންނަވައި ވިލިމާލެ ދާއިރާ ތަމްސީލް ކުރައްވަން ބޭނުންވާތީ އެ ދާއިރާ އަށް ކުރިމަތިލައްވާފައިވާ ކަމަށެވެ.
އާންމު އިންތިހާބުގައި ވިލިމާލެ ތަމްސީލުކުރާ ރައްޔިތުންގެ މަޖިލިސްގެ @TheDemocratsMVގެ ކެނޑިޑޭޓުގެ ގޮތުގައި ކުރިމަތިލައިފިން. ރާއްޖޭގެ ޖުމުލަ ރައްޔިތުންގެ ހާލަތާއި ވިސްނުން އެއްފަސްގަނޑަކުން ވަޒަންކުރެވޭ އާބާދީކަމަށްވާ ވިލިމާލޭ ރައްޔިތުންގެ ތާއީދަށް އެދެން. 🙏 #FaaraveriMajilis
— Mohamed Shifaz *️⃣ (@shippeshifaz) February 13, 2024
"ރާއްޖޭގެ ޖުމްލަ ރައްޔިތުންގެ ހާލަތާއި ވިސްނުން އެއްފަސްގަނޑަކުން ވަޒަން ކުރެވޭ އާބާދީ ކަމަށްވާ ވިލިމާލެ ރައްޔިތުންގެ ތާއީދަށް އެދެން،" ޝިފާޒް ވިދާޅުވިއެވެ.
އިދިކޮޅު އެންމެ ބޮޑު ޕާޓީ، އެމްޑީޕީގެ ނައިބު ރައީސްކަން ވެސް ކުރެއްވި ޝިފާޒް ވަނީ 17 ވަނަ މަޖިލީހުގައި ބާރަށު ދާއިރާގެ މެމްބަރުކަން ވެސް ކުރައްވައިފައެވެ. އަދި 18 ވަނަ މަޖިލިހުގައި ވެސް ބާރަށު ދާއިރާއަށް ވާދަކުރެއްވި ނަމަވެސް އެ އިންތިހާބު ކާމިޔާބު ކުރެވިފައެއް ނުވެއެވެ. އެފަހަރު ވެސް އޭނާ ނުކުންނެވީ އެމްޑީޕީގެ ޓިކެޓުގައެވެ. އަށާރަ ވަނަ މަޖިލިހުގައި އެ ދާއިރާގެ ގޮނޑި ކާމިޔާބު ކުރެއްވީ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއުއެވެ. ޝުޖާއު ވަނީ މިފަހަރުގެ މަޖިލިސް އިންތިހާބުގައި ޕީއެންސީގެ ޓިކެޓުގައި ބާރަށު ދާއިރާ އަށް ވާދަކުރެއްވުމަށް ނިންމަވައިފައެވެ.
ކުރީ ސަރުކާރުގައި ރައީސް އޮފީހުގެ މިނިސްޓަރަކަށް ވެސް ޝިފާޒް ހުންނެވިއެވެ. އެކަމަކު، އެމްޑީޕީގެ ތެރޭގައި ހިޔާލު ތަފާތުވުން އުފެދުމާ ގުޅިގެން އޭނާ ވަނީ މަގާމުން ވަކިކޮށްފައެވެ. އެމްޑީޕީން ވަކިވެ، ޑިމޮކްރެޓްސް ނަމުގައި ސިޔާސީ ޕާޓީއެއް އުފެއްދެވުމުގައި އެންމެ އިސްކޮށް މަސައްކަތް ކުރެއްވީ ވެސް ޝިފާޒެވެ.
