މުހައްމަދު ނިޔާޒް (ޓެޑްރީ) ގިނަ ދުވަސްތަކެއް ވަންދެއް މަސައްކަތް ކުރަމުން އަންނަ ފިލްމު "ލަސްވިޔަސް…" އަންނަ ބުރާސްފަތި ދުވަހު ރަސްމީކޮށް ލޯންޗްކޮށްފިއެވެ.
މި އަހަރުގެ އެޕްރީލް 12 ގައި ބެލުންތެރިންނަށް ގެނެސްދޭން ނިންމާފައިވާ މި ފިލްމްއަކީ ބައްޔަކާ ހަނގުރާމަކުރާ ކުޑަ އަންހެން ކުއްޖެއްގެ ވަށައިގެން އެނބުރޭ ވާހަކައެއް ކިޔައިދޭނެ ފިލްމްއެކެވެ.
ފިލްމުގެ ލޯންޗިން ހަފުލާގައި އޭގެ ރަސްމީ ޕޯސްޓަރާއި ޓްރެއިލާ އާއި ބައެއް ލަވަތަކާއި ފިލްމަށް ހާއްސަ ވީޑިއޯ ލަވައެެއް ވެސް އާންމުކުރާނެ ކަމަށް ޓެޑްރީގެ ފިލްމު ސްޓޫޑިއޯ، އިޓާނަލް ޕިކްޗާސް ގެ ޕޯސްޓްގައި ވަނީ ބުނެފައިއެވެ.
View this post on Instagram
މި ފިލްމް ގެ ލީޑުން ފެނިގެންދާ ތަރިންގެ ތެރޭގައި ހިމެނެނީ ހުނަރުވެރި މޮޅު އެކްޓިންއެއް ދަައްކަމުން އަންނަ ވާޝިޔާ މުޙައްމަދު (ޝިޔާ)، ހުނަރުވެރި އެކްޓަރ އަޙްމަދު އީސާ (އާނަންދު)ގެ އިތުރުން ކުރީގެ އެކްޓްރެސް ނިޢުމާ މުޙައްމަދުގެ ދަރިފުޅު ޒޯޔާ ޙަސަން އިބްރާހީމް އެވެ.
މި ފިލްމުން މަޝްހޫރު އެކްޓްރެސް މަރްހޫމް ފައުޒިއްޔާ ފެނިގެންދާނެ އެވެ. މީގެ އިތުރުން ރާއްޖޭގެ އެންމެ މަޝްހޫރު އެކްޓަރު ރީކޯ މޫސާ މަނިކްވެސް ފެނިގެންދާނެ އެވެ. މާ ދިގު ނޫން ނަމަވެސް މުހިންމު ރޯލަކުން މޫސަ ފެނިގެންދާއިރު، މޫސަ ވަނީ ޓެޑްރީގެ ފިލްމު "ދެރިޔާ" ގައިވެސް މަސައްކަތް ކޮށްފައެވެ.
"ލަސްވިޔަސް" އަކީ ޓެޑްރީ 1994 ގައި ގެނެސްދިން "ދެރިޔާ" އަށް ފަހު، ޑައިރެކްޓްކޮށް، ބެލުންތެރިންނަށް ގެނެސްދޭ ދެވަނަ ފީޗާ ފިލްމެވެ. "ދެރިޔާ" އަކީ ދިވެހި ފިލްމް އިންޑަސްޓްރީގައި ވަރަށް ކާމިޔާބު ފިލްމް އެކެވެ.
