ވެރިކަމުގެ މި ދައުރުގެ ތެރޭގައި ތ. އަތޮޅަށް ގިނަ ރިސޯޓުތަކެއް ގެންނަވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ތ. އަތޮޅުގައި މިހާރު އޮންނަނީ އެންމެ ރިސޯޓަކާއި އެއާޕޯޓެކެވެ. އެގޮތުން އެ އަތޮޅުގައި އޮތީ ތ. ތިމަރަފުށީ އެއާޕޯޓު އެކަންޏެވެ. ރައީސް މުއިއްޒުގެ ވައުދުތަކުގެ ތެރޭގައި ތ. ގުރައިދޫ އާއި ތ. ވިލުފުށީގައި އެއާޕޯޓެއް އެޅުން ހިމެނެއެވެ.
އާންމުންގެ ސުވާލުތަކަށް ޖަވާބު ދެއްވުމަށް "ރައީސްގެ ޖަވާބު" ނަމުގައި ސަރުކާރުން ފަށާފައިވާ ސިލްސިލާ ޕްރޮގްރާމްގެ ދަށުން ތ. ވޭމަންޑޫ ޒުވާނަކު ކުރި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވީ ސަރުކާރުން އިސްކަން ދޭ ކަންކަމުގެ ތެރޭގައި ޒުވާނުންނާއި އެކި އުމުރުފުރައިގެ މީހުންނަށް އާމްދަނީ ލިބޭނެ ގޮތްތައް ހޯދައި ދިނުން ހިމެނޭ ކަމަށެވެ. އަދި ސަރުކާރުގެ އަމާޒަކީ ރާއްޖޭގެ އެންމެ ބޮޑު އިންޑަސްޓްރީ، ޓޫރިޒަމް މިނިސްޓްރީން އެކަން ފަހި ކުރުން ކަމުގައި އެމަނިކުފާނު ވިދާޅުވިއެވެ.
"މި މަސައްކަތް ކުރަނީ އިރާދަކުރެއްވިއްޔާ މި އަތޮޅަށް ގިނަ ރިސޯޓުތަކެއް މި ދައުރުގެ ތެރޭގައި ހަމަ ގެންނާނަން. ވަރަށް ޔަގީންކަން ދެން،" ރައީސް ވިދާޅުވިއެވެ.
ރައީސް ވިދާޅުވީ އެކަން ކުރުމަށްޓަކައި އެއާޕޯޓުތަކެއް ވެސް އިތުރު ކުރަން ޖެހޭ ކަމަށެވެ. އެގޮތުން ގުރައިދޫ އާއި ވިލުފުށީގައި އެއާޕޯޓެއް ހެދިގެންދާނެ ކަމުގައި ވިދާޅުވިއެވެ. އެއާއެކީގައި ތިން އެއާޕޯޓު އައުމުން ކަނެކްޓިވިޓީ އިތުރުވެގެން ދާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސްގެ ޖަވާބު
8 ފެބްރުވަރީ 2024ތ.ވޭމަންޑޫ، ދޫނިގޭ، އާދަމް ރިފާޒް، މި ދައުރުގައި ތ.އަތޮޅަށް ޓޫރިޒަމް ފުޅާވެ ރިސޯޓްތައް އިތުރުވާނެތޯ ދެންނެވި ސުވާލަށް، ރައީސުލްޖުމްހޫރިއްޔާ ދެއްވި ޖަވާބު pic.twitter.com/prnJIzC1yu
— Government of Maldives (@governmentmv) February 8, 2024
އިގްތިސާދީ ގޮތުން ރާއްޖެ އަށް ގެންނަ ބަދަލުގެ ސަބަބުން ރާއްޖެ އަށް އިންވެސްޓަރުން އަންނަ މިންވަރު އިތުރުވެގެން ދާނެ ކަމަށް ވެސް އެމަނިކުފާނު ވިދާޅުވިއެވެ. އެމަނިކުފާނު ވިދާޅުވި ގޮތުގައި، ސަރުކާރުން މަސައްކަތް ކުރަނީ ވެލާނާ އިންޓަނޭޝަލް އެއާޕޯޓު (ވީއައިއޭ) ވަރަށް އަވަހަށް ފުޅާކޮށް ތަރައްގީ ކުރުމަށެވެ. އޭރުން ވެސް ރާއްޖެ އަށް ފަތުރުވެރިން އަންނަ މިންވަރު އިތުރުވެގެން ދާނެ ކަމުގައި ރައީސް ވިދާޅުވިއެވެ.
ރައީސް ވިދާޅުވީ ޒުވާނުން ރަށުގައި ތިބެ ކައިރި ރިސޯޓްތަކުން ވަޒީފާ އަދާކޮށް އާމްދަނީ ހޯދޭނެ މަގު ފަހިކޮށް ދެއްވާނެ ކަމަށެވެ. އަދި ރިސޯޓްތަކުގައި ވަޒީފާ އަދާކުރަމުންދާއިރު ކައިރި ރަށްތަކުގައި ދިރިއުޅޭ މީހުންނަށް ފަސޭހައިން ރަށަށް ދެވޭނެ އިންތިޒާމެއް ހަމަޖައްސައިދޭނެ ކަމަށް ވެސް އެމަނިކުފާނު ވިދާޅުވިއެވެ.
