ތ. އަތޮޅަށް ތަރައްގީގެ ފުރިހަމަ އިހުސާސް ކުރެވޭ ވަރު ކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ތ. އަތޮޅު ކައުންސިލް މެމްބަރުންނާ ބައްދަލު ކުރެއްވުމަށް އަތޮޅު ކައުންސިލް އިދާރާގައި ބޭއްވި ބައްދަލުކުރެއްވުމުގައި ކައުންސިލުން ވަނީ ތ. އަތޮޅުގެ ރަށްތަކުގެ ރައްޔިތުންގެ ހުރި ކަންބޮޑުވުންތައް ރައީސް ޑރ. މުއިއްޒު އަޑު އައްސަވައި އުންމީދީ ޖަވާބުތަކެއް ދެއްވިކަން ޝުކުރުވެރިކަމާއެކު ފާހަގަ ކުރައްވައިފައެވެ.
މި ބައްދަލުކުރެއްވުމުގައި ތ.އަތޮޅުގެ ކައުންސިލުން ވަނީ އަތޮޅުގެ ތަރައްގީއަށް އެންމެ ބޭނުންވާނެ ކަންތައްތައް ތަފުސީލީ ގޮތެއްގައި ރައީސް އާ ހިއްސާ ކުރައްވައިފައެވެ. އެގޮތުން އަތޮޅު ހޮސްޕިޓަލަކީ ޒަމާނީ ހިދުމަތްދޭ ތަނަކަށް ހެދުމަށާއި، އަތޮޅުގައި ހަތަރު ރަށެއް ފަތުރުވެރިކަމަށް ތަރައްގީކުރުމަށް ބޭނުންވާކަމަށް ކައުންސިލުން ފާހަގަ ކުރެއްވިއެވެ.
އަދި ތ އަތޮޅުގައި ބައިނަލްއަގްވާމީ ވައިގެ ބަނދަރަކާއެކު އިކޮނޮމިކް ޒޯނެއް ގާއިމުކުރުމަށް ބޭނުންވާކަމުގައިވެސް ކައުންސިލުން ފާހަގަކުރެއްވިއެވެ. މީގެ އިތުރުން، އަތޮޅުގައި ހުރި މަސް ފެކްޓްރީ ތަރައްގީ ކުރުމަށް ބޭނުންވާކަމަށާއި، އަތޮޅު ތެރޭގައި ދަތުރުފަތުރު ކުރުމުގައި ހުރި ގޮންޖެހުންތައްވެސް ކައުންސިލުންވަނީ ރައީސްއާ ކުރައްވާފައެވެ.
ރައީސް ޑރ. މުއިއްޒު ވިދާޅުވީ ހޮސްޕިޓަލް އަޕްގްރޭޑްކުރުމުގެ މަސައްކަތް ކުރައްވާނެ ކަމަށެވެ. އަދި އެމަނިކުފާނު ވަނީ އަތޮޅުގެ އިގްތިސާދު ވަރުގަދަކުރުމަށް މި ސަރުކާރުން ކުރައްވާ ކަންކަން އަތޮޅު ކައުންސިލާ ހިއްސާކުރައްވާފައެވެ. މީގެ އިތުރުންވެސް ކޮންމެ ކައުންސިލަކަށްވެސް ފައިދާވާނެ ގޮތަކަށް އިހްތިސާސްގައި ހުރި ރަށްތައް ބޭނުންކޮށް، އާންމު ފަރުދުންގެ މާލީ ތަނަވަސްކަން އިތުރުކުރުމަށް އެމަނިކުފާނު ބާރުއެޅުއްވިއެވެ. ހަމަ އެއާއެކު ސަރުކާރުގެ މައިގަނޑު ސިޔާސަތުތަކާ ގުޅުންހުރި ދާއިރާތަކުން އިންވެސްޓަރުން ހޯދުމުގެ ފުރުސަތު ހުރިހާ ކައުންސިލަކަށްވެސް އޮންނާނެ ކަމަށާއި އެކަމަށް ސަރުކާރުން ފުރިހަމަ އެއްބާރުލުން ދެއްވާނެކަމުގައި ރައީސް ވިދާޅުވިއެވެ. އަދި ތ.އަތޮޅަށް ތަރައްގީގެ ފުރިހަމަ އިހުސާސްކުރެވޭވަރު މި ސަރުކާރުން ކޮށްދެއްވާނެކަމުގައި އެމަނިކުފާނު ވިދާޅުވިއެވެ.
