ތ. ދިޔަމިގިލި އާއި ތ. މެދުފުށި ކޯޒްވޭއަކުން ގުޅާލުމަށް ވެވަޑައިގެންނެވި ވައުދުފުޅު ހަގީގަތަކަށް ހައްދަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ދިޔަމިގިލީ ރައްޔިތުންނާ ބައްދަލު ކުރެއްވުމަށް އެ ރަށަށް ވަޑައިގެން ބޭއްވެވި ޖަލްސާގައި ރައީސް މުއިއްޒު ވިދާޅުވީ ރާއްޖޭގެ އިގްތިސާދީ ހާލަތު ރަނގަޅުވެގެންދާ މިންވަރަކުން މަޝްރޫއުތައް ފެށިގެންދާނެ ކަމަށެވެ. އަދި ދިޔަމިގިއްޔާއި މެދުފުށި ކޯޒްވޭގެ މަސައްކަތާ އެހެން މަޝްރޫއުތައް ވެސް ކުރިއަށްދާނެ ކަމަށް އެމަނިކުފާނު ވިދާޅުވިއެވެ.
"އިގްތިސާދު ރަނގަޅު ކުރުމަށްޓަކައި ކުރާ މަސައްކަތުގެ ނަތީޖާއަކަށްވާނީ މާ ލަސްތަކެއް ނުވެ ރަށްރަށުގައި ކުރަންޖެހޭ ތަރައްގީގެ މަޝްރޫއުތަކަށް ބޭނުންވާ މިންވަރަށް އާމްދަނީ އިތުރުވެގެން ދިޔުން" ރައީސް މުއިއްޒު ވިދާޅުވިއެވެ.
ރައީސް ވިދާޅުވީ ސަރުކާރުން ބޭނުންވަނީ ކޮންމެ ރައްޔިތަކަށް މުއްސަނދިކަން ލިބި، އިގްތިސާދީ ގޮތުން ބާރުވެރިކަން ލިބިގެންދިޔުން ކަމަށެވެ. މިއަހަރު ތެރޭގައި ވެސް ދިޔަމިގިލީ ރަށު ކައުންސިލުން ބޭނުންވާ ތަރައްގީގެ މަޝްރޫއުތައް ފަށަން ބޭނުންފުޅުވާ ކަމަށާއި ކައުންސިލުން ރަށުގައި ކުރިއަށް ގެންދަން ބޭނުންވާ މަޝްރޫއުތައް ތަރުތީބު ކުރުމަށްފަހު އެކަންތައްތައް ހުށަހަޅައިދެއްވުމަށް ރައީސް ވަނީ އެދިވަޑައިގެންފައެވެ.
"އަޅުގަނޑަކީ ވަރަށް ބޮޑަށް މިކަހަލަ ތަރައްގީގެ މަޝްރޫއުތައް ކުރިއަށް ގެންދަން ބޭނުންވާ މީހެއް، ގައުމު މިއޮތް ދަރަނިވެރި ހާލަތުން އަރައިގަންނަން އެބަޖެހޭ. އެ ހަގީގަތް ގަބޫލުކުރަން ޖެހޭ އަދި އެ ހަގީގަތާއެކު ކުރިއަށްދާން އެބަޖެހޭ" ރައީސް ވިދާޅުވިއެވެ.
"ރައްޔިތުންނާއި ހަމައަށް އައިސް ކަންކަން އޮޅުންފިލުވާ މަޝްވަރާ ކުރާ އުސޫލުން ރަށަށް ބޭނުން ގިނަ ތަރައްގީގެ މަޝްރޫއުތައް އެބަހުރި، ރަށުގެ ރައްޔިތުންނަށް ދޭން ބޭނުންވާ މެސެޖަކީ ތަރައްގީއަށްޓަކައި ކުރަން ޖެހޭ ހުރިހާ ކަންކަމަށް ސަމާލުކަން ދޭނެކަން." ރައީސް ވިދާޅުވިއެވެ.
