މީހުން ދިރިއުޅޭ ކޮންމެ ރަށެއްގައި ގައުމީ ކުތުބުހާނާގެ ގޮތްޕެއް ގާއިމުކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް މުއިއްޒު، ރައްޔިތުންގެ މަޖިލިހަށް މިއަދު އިއްވެވި ރިޔާސީ ބަޔާނުގައި އެމަނިކުފާނު ވިދާޅުވީ އިލްމާއި ފޮތްކިޔުމަށް އޮތް ލޯބި އިތުރުކުރުމަށް މި ސަރުކާރުން މަސައްކަތް ކުރައްވާނެ ކަމަށެވެ. މި ދައުރުގައި ރާއްޖޭގެ ތައުލީމީ ދާއިރާއަށް އީޖާބީ ބޮޑު ބަދަލެއް ގެންނަވާނެ ކަމަށާއި އެކަމުގެ ސަބަބުން ދިވެހިވަންތަކަމަށް ލޯބިކުރާ، އުޅުންހުރި، ހުލްގު ރަނގަޅު ޖީލުތައް ތަރުބިއްޔަތު ވެގެން ނުކުންނާނެ ކަމަށް ވެސް ރައީސް ވިދާޅުވިއެވެ.
"އިލްމާއި ފޮތްކިޔުމަށް އަޅުގަނޑުމެންގެ ތެރޭގައި އޮތް ލޯބި އިތުރުކޮށް، ރާއްޖޭގެ ކޮންމެ ރަށެއްގައި ގައުމީ ކުތުބުހާނާގެ ގޮތްޕެއް އިރާދަކުރެއްވިއްޔާ އަޅުގަނޑުމެން ގާއިމުކުރާނަން،"ރައީސްކަމުގެ މަގާމާ ހަވާލުވެވަޑައިގެންނެވި ފަހުން ދެއްވި ފުރަތަމަ ރިޔާސީ ބަޔާނުގައި ރައީސް ވިދާޅުވިއެވެ.
ރާއްޖޭގެ ގައުމީ ކުތުބުހާނާގެ ބިންގާ އެޅީ ޖުލައި 12، 1945 ގައެވެ. އެ އިމާރާތަށް އޭރު ދީފައިވަނީ ސްޓޭޓް ލައިބްރަރީގެ ނަމެވެ. މިހާރު ބޭނުންކުރަމުން އަންނަ "ގައުމީ ކުތުބުހާނާ"ގެ ނަމަށް ރަސްމީކޮށް ފަހުން ބަދަލުކުރިއެވެ.
