ލ. އަތޮޅުގައި ނަފްސާނީ ބަލިތަކަށް ފަރުވާދޭ ހާއްސަ ހޮސްޕިޓަލަކާއި މާލެ ސަރަހައްދުގައި އިތުރު ހޮސްޕިޓަލްތަކެއް އެޅުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައްޔިތުންގެ މަޖިލިހަށް ރިޔާސީ ބަޔާން އިއްވަވައި ދެއްވަމުން ރައީސް މުއިއްޒު ވިދާޅުވީ ރާއްޖޭގެ އެކި ސަރަޙައްދުގައި ޓާޝަރީ ހޮސްޕިޓަލް ބިނާކުރުމަށް ސަރުކާރުން މިއަހަރު ފަށާ މަޝްރޫއު ފުރިހަމަވުމުން މާލެ ނައިސް ރަށާ ކައިރިން ސިއްހީ ފަރުވާ ހޯދޭނެ މަގު ފަހިވާނެ ކަމަށެވެ.
އެގޮތުން ރައީސް އިއުލާން ކުރެއްވި ގޮތުގައި ލ. އަތޮޅުގައި ނަފްސާނީ ބަލިތަކަށް ފަރުވާދޭ ހޮސްޕިޓަލެއް ވަނީ ގާއިމު ކުރަން ނިންމައިފައެވެ. ސަރުކާރުން މި ހޮސްޕިޓަލް ގާއިމު ކުރާނީ ލ. ގަމުގައެވެ. އެފަދަ ހޮސްޕިޓަލެއް އެ ރަށުގައި ގާއިމު ކުރުމަކީ ރައީސްގެ ރިޔާސީ ވައުދެކެވެ.
މީގެއިތުރުން ކެންސަރަށް ފަރުވާދޭ ހާއްސަ ހޮސްޕިޓަލަކާއި ތެލަސީމިއާ ކުދީންނަށް ފަރުވާދޭ ހާއްސަ ހޮސްޕިޓަލަކާއި އަންހެނުންނާ ކުޑަކުދިންނަށް ފަރުވާދޭ ހާއްސަ ހޮސްޕިޓަލެއް މި ދައުރުގައި މާލެ ސިޓީގައި ބިނާ ކުރައްވާނެ ކަމަށް ވެސް ރައީސް މުއިއްޒު ވިދާޅުވިއެވެ.
އަދި ދަރުމަވަންތަ ހޮސްޕިޓަލްގެ ހިދުމަތްތައް ފުރިހަމަ ކުރަން ޒަމާނީ އިތުރު ބިނާއެއްކޮށް ވިލިމާލޭގައި ވެސް 100 އެނދުގެ ޓާޝަރީ ހޮސްޕިޓަލެއް އަޅާނެ ކަމުގައި ރައީސް ވިދާޅުވިއެވެ. އައްޑޫ ސިޓީ ހިތަދޫގައި ހުރި ހޮސްޕިޓަލް އަދި ކުޅުދުއްފުށީގައި ހުރި ހޮސްޕިޓަލްގެ ފެންވަރު މަތިކޮށް، މާލެ ނައިސް މައިގަނޑު ހުރިހާ ފަރުވާއެއް ލިބޭ ފެންވަރަށް ތަރައްގީކުރުމުގެ މަސައްކަތް މި އަހަރު ފެށިގެންދާނެ ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވި ގޮތުގައި ސަރުކާރުގެ ތަސައްވުރާ އެއްގޮތަށް ރާއްޖޭގެ އެކިކަންކޮޅުތަކުގައި މިކަންކަން ފުރިހަމަވާ އިރު، ރާއްޖެ އިން ބޭރަށް ނުގޮސް ގިނަ ސިއްހީ ފަރުވާތައް ހޯދޭނެއެވެ. އަދި ފަރުވާ ހޯދުމަށް ހޮސްޕިޓަލްތަކުގައި ކިއޫގައި ގިނަ ދުވަހު އިންތިޒާރު ކުރަން ނުޖެހި، އަވަސް ހިދުމަތް ލިބެން ފަށާނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ