މިއަދު އޮތް މާލޭ ސިޓީގެ މޭޔަރ ބައި އިލެކްޝަންއިން ސަރުކާރު ކެނޑިޑޭޓް ބަލިވީ، ސަރުކާރަށް ރައްޔިތުންގެ އިތުބާރު ނެތިގެން ނޫން ކަމަށާއި، އިންތިޚާބުން ބަލިވީ މަސައްކަތްކުރަންވާ ވަރަށް މަސައްކަތް ނުކުރެވިގެން ކަމުގައި ރައީސުލްޖުމުހޫރިއްޔާގެ ޚާއްސަ މުޝީރު އަބުދުއްރަހީމް ވިދާޅުވެއްޖެއެވެ.
އަބުދުއްރަހީމް މިހެން ވިދާޅުވީ މިއަދުގެ އިންތިޚާބުގެ ނަތީޖާއަށްފަހު ޕީއެންސީ އޮފީހުގައި މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
މިރޭ ޕީއެންސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަދުރޭ ވިދާޅުވީ، އެހެންނަމަވެސް މިއަދުގެ އިންތިޚާބަކީ ލިބުނު ފިލާވަޅެއްކަމުގައި ބަލައިގެން، ކުރިޔަށްހުރި އިންތިޚާބުތަކުގެ ނަތީޖާ ރަގަޅު ކުރުމަށް ސަރުކާރުން މަސައްކަތް ކުރާނެ ކަމުގައެވެ.
މައިގަނޑު ސަބަބަކީ މަސައްކަތްކުރަންވާ ވަރަށް މަސައްކަތް ނުކުރެވެމުގެ ނަތިއްޖާ، ސަރުކާރުގެ ސިޔާސަތައް އިތުބާރު ނެތީއެއް ނޫން، ރައީސަށް އިތުބާރު ނެތުނީއެއް ނޫން. ރައީސް ހިދުމަތެއް ނުކޮށްދެއްވައިގެނެއް ނޫން. މި ދެންނެވީ މައިގަނޑު ސަބަބަކީ.
އަބުދުއްރަހީމް ވިދާޅުވިއެވެ.
މާލޭ ސިޓީގެ މޭޔަރު އިންތިޚާބު ކުރުމަށް މިއަދު ބޭއްވުނު އިންތިޚާބުގެ ވަގުތީ ނަތީޖާތައް ދައްކާ ގޮތުން، އެމްޑީޕީގެ ކެނޑިޑޭޓް އާދަމް އާޒިމް ވަނީ 7،621 ވޯޓު ހޯއްދަވައިފައެވެ. އެއީ، ވޯޓުލުމުގެ ހައްގު ލިބިފައިވާ 54،680 މީހުންގެ ތެރެއިން ވޯޓުލާން ނުކުތް 17،500 މީހުންގެ ތެރެއިންނެވެ.
މޭޔަރުކަމަށް އާޒިމްގެ އިތުރުން ވާދަކުރެއްވި ބޭފުޅުންގެ ނަތީޖާތައް:
- އާއިޝަތު އާޒިމާ ޝަކޫރު – ޕީއެންސީ – ލިބުނު ވޯޓު: 5،032
- ޝުއައިބު އަލީ (ފުރަހަނި) – އަމިއްލަ ގޮތުން – ލިބުނު ވޯޓު: 125
- ހުސައިން ވަހީދު – ޕީއެންއެފްގެ ތާއީދާއެކު އަމިއްލަ ގޮތުން – ލިބުނު ވޯޓު: 1،888
- މުހައްމަދު ސައިފް ފާތިހު – ދަ ޑިމޮކްރެޓްސް – ލިބުނު ވޯޓު: 2،336
އިންތިޚާބުގައި ވޯޓުލާން ނުކުތް މީހުންގެ އަދަދު މަދު ވުމުގެ ކަންބޮޑުވުން އިލެކްޝަންސް ކޮމިޝަން (އީސީ)ން ވެސް ފާޅުކުރައްވައިފައެވެ.
