އެމްޑީޕީ ދެމި އޮންނާނީ މާލޭގެ ރައްޔިތުންގެ އިހުސާސްތަކާ އެއްގޮތަށް މަސައްކަތް ކުރުމުގައި ރައީސް ސާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ބޭއްވުނު މާލޭ ސިޓީގެ މޭޔަރ ބައި އިލެކްޝަން އެމްޑީޕީގެ ކެނޑިޑޭޓް އާދަމް އާޒިމް ކާމިޔާބު ކުރެއްވުމާއި ގުޅިގެން އޭނާއަށް މަރުހަބާ ދެންނެވުމަށް ކުރެއްވި އެކްސް ޕޯސްޓުގައެވެ.
މިއަދު ބޭއްވި މާލޭ މޭޔަރގެ ބައިއިލެކްޝަން ތަނަވަސް އަޤްލަބިއްޔަތަކުން ކާމިޔާބު ކުރެއްވި @adamazim އަށް އިޙްލާޞްތެރި މަރުހަބާ ދަންނަވަން. މާލޭގެ ރައްޔިތުންގެ އިޙްޞާސްތަކާ އެއްގޮތަށް މަސައްކަތްކުރުމުގައި @MDPSecretariat ސާބިތުވެ ދެމިއޮންނާނެ.
— Ibrahim Mohamed Solih (@ibusolih) January 13, 2024
މާލޭގެ މޭޔަރު އިންތިޚާބު ކުރުމަށް މިއަދު ބޭއްވުނު ބައި-އިލެކްޝަން، ވެރިކަންކުރާ ޕީއެންސީގެ ކެނޑިޑޭޓް އާޒިމާ ޝަކޫރު ބަލިކޮށް، އިނދިކޮޅު އެމްޑީޕީގެ ކެނޑިޑޭޓް އާދަމް އާޒިމް ކާމިޔާބު ކުރެއްވީ ބޮޑު ތަފާތަކުންނެވެ.
މިހާތަނަށް އާންމުކޮށްފައިވާ ވޯޓު ފޮށިތަކުގެ ވަގުތީ ނަތީޖާތައް ދައްކާ ގޮތުގައި، އާދަމް އާޒިމަށް ވަނީ 7،415 ވޯޓު ލިބިވަޑައިގެންފައެވެ. އޭނާއާ އެންމެ ވާދަކުރެއްވީ ޕީއެންސީގެ ކެންޑިޑޭޓު އަދި ކުރީގެ ބަންޑާރަ ނައިބު އައިޝަތު އާޒިމާ ޝަކޫރެވެ. އާޒިމާ އަށް 4،925 ވޯޓު ލިބިވަޑައިގެންފައިވެއެވެ.
ތިން ވަނައިގައި އުޅުއްވަނީ ދަ ޑިމޮކްރެޓްސްގެ ކެންޑިޑޭޓު މުހައްމަދު ސައިފް ފާތިހެވެ. އޭނާ އަށް 2،285 ވޯޓު ލިބިވަޑައިގެންފައިވާ އިރު، ހަތަރު ވަނައިގައި އުޅެނީ އަމިއްލަ ގޮތުން ވާދަކުރައްވާ އަދި ކުރީގެ ރައީސް ޔާމީންގެ ތާއީދާ އެކުގައި ބައި އިލެކްޝަންގައި ވާދަކުރެއްވި ހުސެއިން ވަހީދެވެ. އޭނާ އަށް ލިބިވަޑައިގަތީ 1،821 ވޯޓެވެ. އަދި ފަސް ވަނަ އަށް ދިޔައީ އަމިއްލަ ގޮތުން ވާދަކުރައްވާ ޝުއައިބު އަލީއެވެ. އޭނާ އަށް ލިބިވަޑައިގަތީ 117 ވޯޓެވެ.
ކޮމެންޓު ފޮނުވާ