މާދަމާ ބާއްވާ މާލޭގެ މޭޔަރ ބައި އިލެކްޝަންގައި، ރައްޔިތުންނާއި ގުޅިގެން ސަރުކާރުގެ ސިޔާސަތު ތަންފީޒުކޮށްދޭނެ މޭޔަރަކު އިންތިޚާބު ކޮށްދިނުމަށް ރައީސް މުއިއްޒު އިލްތިމާސް ކޮށްފިއެވެ.
މިއަދު އާންމު ކުރެއްވި ވީޑިއޯ މެސެޖެއްގައި ރައީސް މުއިއްޒު ވިދާޅުވީ ކުރިން ސަރުކާރު ލެވެލްގަ އެއްބާރުލުން ނުލިބުނު އެތައް މަސައްކަތެއް ފެށިގެން މިހާރު ކުރިޔަށްދާ ކަމަށާއި، އޭގެ ތެރޭގައި މަގުހެދުމާއި، ހައުސިން މަޝްރޫއުތަކާއި ޕާކިން ބިލްޑިންތައް ހެދުމުގެ މަސައްކަތްތައް ހިމެނޭކަމަށެވެ.
ރައީސް ވިދާޅުވީ މި މަސައްކަތްތައް ކުރުމަށް މިހާރު މާލޭ ސިޓީ ކައުންސިލަށް ފުރުސަތު ދީފައިވާ ކަމަށެވެ.
ރައީސް މުއިއްޒު ވިދާޅުވީ ސަރުކާރާ ދެކޮޅު ވިސްނުމެއް ގެންގުޅޭ ޕާޓީއަކުން މާލޭގެ މޭޔަރުކަމަށް ބޭފުޅަކު އިންތިޚާބު ވެއްޖެނަމަ، މާޒީގައި ފެނުފައި ހުރިކަހަލަ ހިތި ތަޖުރުބާތަކެއް މާލޭގެ ރައްޔިތުންނަށް ޖެހިދާނެ ކަމަށެވެ. އަދި އެކަމާ ކަންބޮޑު ވާކަމަށްވެސް ރައީސް ވިދާޅުވިއެވެ.
އަޅުގަޑު ޔަގީންކުރަން، މާދަމާގެ އިންތިޚާބުގަ މާލޭގެ ރައްޔިތުން އެކަހަލަ ރިސްކެއް ނުނަންގަވާނެކަމަށް. މާލޭގެ ތަރައްގީއަށްޓަކާ ރައްޔިތުން އެދިވަޑައިގަންނަވާ އެންމެ މުހިންމު ކަންކަން ސަރުކާރާ ގުޅިގެން ރައްޔިތުންނާ އެކީގަ، ސަރުކާރާ ރައްޔިތުންނާ ދޭތެރޭގަ މެދުވެރިއަކަށްވާ، ރައްޔިތުންގެ ފަރާތުން ހުންނަ މޭޔަރަކު ހޮވުމުގަ މާލޭރައްޔިތުން މާދަމާ ސަރުކާރަށް ތާއީދުކުރައްވާ ސަރުކާރުގެ ސިޔާސަތުތައް ރައްޔިތުންނާއި ގުޅިގެން ތަންފީޒުކޮށްދޭނެ މޭޔަރަކު ހޮވާނެކަމަށް.
ރައީސްގެ ވީޑިއޯ މެސެޖުގަ ވިދާޅުވިއެވެ.
ރައީސް މުއިއްޒު މި އިންތިޚާބުގައި ވޯޓު ދެއްވަން ވާނީ ވަރަށްބޮޑަށް ވިސްނާފަ ކަމަށާއި، މާލޭގެ ރައްޔިތުންނަށް ބޭނުންވާ ވަރަށް ގިނަ ކަންކަން މިހާރު ފެށިފައިވާ ކަމަށެވެ.
