ޗައިނާގެ ރައީސް ޝީ ޖިންގްޕިންގ ރާއްޖެއަށް ވަޑައިގަތުމަށް ރައީސް މުއިއްޒު ދައުވަތު ދެއްވައިފިއެވެ.
މިކަން ހާމަކޮށްފައިވަނީ، ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސް މުއިއްޒު ޗައިނާއަށް މިހާރު ކުރައްވަމުން ގެންދަވާ ދަތުފުޅުގައި ދެފަރާތުން އެއްބަސްވާ ކަންކަމާއި ގުޅޭގޮތުން ރައީސް އޮފީހުން ނެރުއްވި ޖޮއިންޓް ޕްރެސް ކޮމިއުނިކޭޝަންގައެވެ.
މި ޖޮއިންޓް ޕްރެސް ކޮމިއުނިކޭޝަންގައި ވާގޮތުން ރައީސުލްޖުމްހޫރިއްޔާ މުޙަންމަދު މުޢިއްޒު ޗައިނާއަށް ކުރެއްވި ދަތުރުފުޅުގެ ނަތީޖާއާ މެދު ދެފަރާތުން ވެސް ހިތްހަމަޖެހޭކަން ފާހަގަ ކޮށްފައި ވެއެވެ. އަދި ޗައިނާ-މޯލްޑިވްސް ކޮމްޕްރެހެންސިވް ސްޓްރެޓެޖިކް ކޯޕަރޭޓިވް ޕާޓްނަރޝިޕް ކުރިއަށް ގެންދިއުމަށް މިދަތުރުފުޅަކީ ވަރަށް މުހިންމު ދަތުރެއްކަމަށް ދެފަރާތުންވެސް ވަނީ އެއްބަސް ވެފައެވެ.
މި ޖޮއިންޓް ޕްރެސް ކޮމިއުނިކޭޝަންގައި ވާގޮތުން، ދެފަރާތުގެ ދެމެދުގައި ބޭއްވުނު ވާހަކަ ތަކުގައު ރައީސް މުޙައްމަދު މުޢިއްޒު ދެއްކެވި ވާހަކަފުޅުގައި ޗައިނާގެ ރައީސް ޝީ ޖިންޕިންގއަށާއި، ޗައިނާ ސަރުކާރަށާއި، ޗައިނާ ގެ ރައްޔިތުންނަށް ދެއްވި ހޫނު މެހްމާންދާރީއަށް ޝުކުރު އަދާކުރައްވާފައި ވެއެވެ.
އަދި ޗައިނާގެ ވެރިންނަށް، ފަސޭހަ ވަގުތުތަކުގައި ރާއްޖެ ވަޑައިގަތުމަށް އެމަނިކުފާނުވަނީ ދަޢުވަތު ދެއްވާފައެވެ. އަދި ޑިޕްލޮމެޓިކް ޗެނަލްތައް މެދުވެރިކޮށް މިކަމާ ގުޅޭ މުއާމަލާތްތައް ކުރިޔަށް ގެންދިއުމަށްވެސް ދެ ފަރާތުން ވަނީ އެއްބަސްވެފައެވެ.
