މަޒީގެ ތަޖުރިބާއަށް ބަލާ، މުސްތަގުބަލް ބިނާކުރުމަށް ލިބިފައި މިވަނީ ތާރީޚީ ފުރުސަތެއްކަމުގައި ޗައިނާގެ ރައީސް ޝީ ޖިންޕިންގ ވިދާޅުވެއްޖެއެވެ.
ޝީ ޖިންޕިންގ މިހެން ވިދާޅުވީ، އެމަނުކުފާނުގެ ދައުވަތަކަށް ރައީސް މުއިއްޒު މިހާރު ޗައިނާއަށް ކުރައްވަމުންގެންދަވާ ފުރަމާނަ ދަތުރުފުޅުގައި، ދިވެހިރާއްޖެއާއި ޗައިނާއާ ދެ ޤައުމުގެ ސަރުކާރުގެ މެދުގައި މިއަދު ކުރިއަށް ގެންދިޔަ ރަސްމީ މަޝްވަރާތަކުގައި ވާހަކަ ދައްކަވަމުންނެވެ.
މި ބައްދަލުކުރެއްވުމުގައި ދެ ޤައުމުގެ އިސްވެރިން ވަނީ ދެޤައުމުގެ ގުޅުން ފުޅާކޮށް ސްޓްރެޓެޖިކް ކޯޕަރޭޓިވް ޕާރޓްނަރޝިޕް އިތުރުކުރައްވާނެކަން ހާމަކުރައްވާފައެވެ.
މި ބައްދަލު ކުރެއްވުމުގައި ޗައިނާގެ ރައީސް ޝީ ވިދާޅުވީ ޒަމާންވީ މެރިޓައިމް ސިލްކް ރޯޑުމެދުވެރިކޮށް ދެ ގައުމުގެ ރައްޔިތުން އެކުވެރި ގުޅުމެއް ގާއިމުކޮށް، ބެލްޓް އެންޑް ރޯޑާއި އެހެނިހެން ދާއިރާތައް ކުރިއެރުމަށް ފާއިތުވި އަހަރުތަކުގައި އުފެއްދުންތެރިކަމާއެކު އެއްބާރުލުން ދީ، ފާއިތުވި 52 އަހަރުގެ ޑިޕްލޮމެޓިކް ގުޅުމުގެ ތެރޭގައި ބޮޑެތި އަދި ކުދި ގައުމުތަކުގެ މެދުގައި ހަމަހަމަކަމާއި، އެއްބަޔަކު އަނެއް ބަޔަކަށް އެހީތެރިކަން ފޯރުކޮށްދިނުމާއި، އެއްބަޔަކު އަނެއް ބަޔަކަށް ފައިދާވާ ކަމުގެ ރަނގަޅު ނަމޫނާއެއް ދެއްކެވިފައި ވާކަމަށެވެ.
އާ ހާލަތުގައި ޗައިނާ އާއި ރާއްޖެއާ ދެމެދު އޮތް ގުޅުމަކީ ކުރީގެ ކާމިޔާބީތަކުގެ މައްޗަށް ބިނާކޮށް ކުރިއަށް ދިއުމަށް ތާރީހީ ފުރުސަތަކާ ކުރިމަތިލާން ޖެހިފައިވާ ގުޅުމެއް.
ދެ ގައުމުގެ ގުޅުން އިތުރަށް ބަދަހިވެ، ދެ ގައުމުގެ ރައްޔިތުންގެ އުންމީދުތައް ހާސިލްވާ ކަމަށް ފާހަގަ ކުރައްވަމުން ޝީ ވިދާޅުވި އެވެ.
މި ބައްދަލުވުމުގައި ޝީ ވަނީ ފާއިތުވި ގަރުނުގައި ޗައިނާގެ ކޮމިއުނިސްޓް ޕާޓީން ކުރި ބުރަ މަސައްކަތާއި އަގުހުރި ތަޖުރިބާގެ ވާހަކަ ދައްކަވާފަ އެވެ. އަދި ރާއްޖޭގެ ޤައުމީ ޙާލަތަށް ފެތޭ ތަރައްޤީގެ މަގެއް ހޯދުމުގައި ޗައިނާއިން އިޙްތިރާމްކޮށް އެއްބާރުލުންދޭކަމަށާއި، ރާއްޖޭގެ ޤައުމީ ސިޔާދަތާއި، މިނިވަންކަމާއި، ސަރަޙައްދީ އެއްބައިވަންތަކަމާއި، ޤައުމީ ކަރާމާތް ޙިމާޔަތްކުރުމުގައި ޗައިނާއިން އަބަދުވެސް އެއްބާރުލުން ދޭކަމުގައިވެސް ރައީސް ޝީ ވިދާޅުވިއެވެ.
މި ބައްދަލުވުމުގައި ރައީސް މުއިއްޒު ވިދާޅުވީ ކެބިނެޓްގެ މުހިންމު ބައެއް ވަޒީރުންނާއެކު ޗައިނާއަށް ކުރެއްވި ފުރަތަމަ ރަސްމީ ދަތުރުފުޅުގެ އިތުރުން ޗައިނާއިން މިއަހަރު ފުރަތަމަ ޒިޔާރަތްކުރެއްވި ބޭރު ގައުމެއްގެ އެންމެ އިސް ވެރިޔާގެ ޝަރަފު ލިބިވަޑައިގަތުމަކީ އެމަނިކުފާނަށް ލިބޭ ޝަރަފެއް ކަމަށާއި، ދެ ގައުމުގެ ގުޅުން ބަދަހިކުރުމަށް ދެ ފަރާތުން ދޭ ވަރަށް ބޮޑު އަހަންމިއްޔަތު ފުރިހަމައަށް ދައްކުވައިދޭ ކަމެއް ކަމުގައެވެ.
މި ބައްދަލުވުމުގައި ރައީސް މުއިއްޒު އިތުރަށް ވިދާޅުވީ އެއް ޗައިނާ ސިޔާސަތު ރާއްޖެއިން ހަރުދަނާގޮތެއްގައި ބަލައިގަންނަ ސިޔާސަތެއް ކަމުގައެވެ. އަދި ޤައުމީ ސިޔާދަތާއި، މިނިވަންކަމާއި، ސަރަޙައްދީ އެއްބައިވަންތަކަން ޙިމާޔަތްކުރުމުގައި ދެޤައުމުގެ އެއްބާރުލުން ދިނުމަކީ، ދިވެހިރާއްޖެއާއި ޗައިނާއާ ދެޤައުމުގެ ދެމެދުގައި އޮތް ގުޅުން ދެމެހެއްޓެނިވި ގޮތެއްގައި ކުރިއެރުވުމަށް އެޅޭ ހަރުދަނާ ބިންގަލެއްކަމަށްވެސް ރައީސް މުއިއްޒު ވިދާޅުވިއެވެ.
